Հայաստանի տնտեսությունը կաթվածահար է եղել. Սուքիաս Ավետիսյան

2 օր առաջ ՀՀ նախագահ Սերժ Սարգսյանը շնորհավորական ուղերձ էր հղել Էստոնիայի Հանրապետության անկախության օրվա առթիվ: Հարկ է նկատել, որ այս երկիրն իր ազատության համար պայքարի ուղին բռնեց Հայաստանին զուգահեռ ու միևնույն ժամանակահատվածում էլ ձեռք բերեց անկախություն: Այսօր Էստոնիան ունի շուրջ 1,4 մլն բնակչություն: Այսինքն` Հայաստանի բնակչության ճիշտ կեսը, սակայն այս երկրի բյուջեն Հայաստանի բյուջեյի կրկնապատիկն է:

Ի ՞ նչը խանգարեց Հայաստանի իշխանությանը խթանել տնտեսության զարգացմանը, որտե ՞ ղ սխալվեց և ինչո ՞ ւ ձախողվեց:

ՀՀԿ անդամ, ԱԺ պատգամավոր Սուքիաս Ավտիսյանը newspress.am-ի հետ զրույցում նկատեց, որ դա ձախողում չէ:

«Առաջին հերթին պետք է նկատի ունենանք տարածքային դիրքը: Չմոռանանք, որ մենք մինչ օրս կիսաշրջափակման մեջ ենք, իսկ էստոնիան ազատ կարող է ցանակացած ուղղությամբ և բեռնափոխադրում իրականացնել, և ներկրում, և արտահանում: Երկրոդը չմոռանաք, թե ինչ վիճակում էինք անկախությունից հետո, այսինքն երկրաշարժ, շրջափակում, պատերազմ: Իսկ Էստոնիան նման խնդիր չի ունեցել»,-ասաց Ավետիսյանը:

Ըստ նրա` այս 3 ֆակտորները կաշկանդում են, որ հնարավորություն ունենանք ավելի արագ զարգացնելու երկրի տնտեսությունը: Ավետիսյանի խոսքով, եթե աղետի հետևանքները վերացել են, ապա շրջափակման հետևանքները մինչև հիմա չեն կարողանում վերացնել:

«Ամբողջ տնտեսությունը կաթվածահար է եղել և չենք կարող վերականգնել. այսօր մենք պատերազմի մեջ ենք համարվում, որը էապես խանգարում է, որպեսզի մենք ավելի մեծ գումարներ ներդնենք տնտեսության զարգացման մեջ»,- նկատեց հանրապետական պատգամավորը:
Անցած տարի մենք գրանցել ենք 2.2 % աճ, այս տարի էլ այդքան տնտեսական աճ է նախատեսվում: Ավետիսյանը նկատում է` փոքր բյուջեի համար 2.2 տոկոսը քիչ էֆեկտիվություն է արտահայտում:

«Բնական է, եթե մեծ բյուջե ունենայինք, ավելի շատ էֆեկտիվություն կտար: Բայց կարևորն այն է որ առաջընթաց կա. դանդաղ, բայց փորձում ենք այդ աճը ապահովել»,- նշեց Ավետիսյանը: