ԱՊՀ երկրների սահմանապահներն առանց Հայաստանի քննարկել են հատուկ գործողություններ իրականացնելու հարցը

Անկախ Պետությունների Համագործակցության (ԱՊՀ) անդամ երկրների սահմանապահ զորքերի հրամանատարների խորհուրդը քննարկել է 2025 թվականին հյուսիսարևմտյան, արևմտյան և միջինասիական ուղղություններով համատեղ հատուկ գործողություններ իրականացնելու հարցերը։ ՏԱՍՍ-ը հայտնում է, որ այդ մասին Բրեստում կայացած խորհրդի նիստի արդյունքներով հայտնել է կառույցի համակարգող ծառայությունը։

«Հրամանատարների խորհրդի անդամները գնահատել են 2024 թվականին իրականացված «Արևմուտք-2024» և «Շեկարա-2024» համատեղ հատուկ սահմանային գործողությունները, որոնք կազմակերպվել են Բելառուսի Հանրապետության պետական սահմանային կոմիտեի և Ղազախստանի սահմանային ծառայության (Ազգային անվտանգության) կողմից։ Քննարկվել են 2025 թվականին հյուսիսարևմտյան, արևմտյան և կենտրոնական ասիական ուղղություններով համատեղ հատուկ սահմանային գործողություններ իրականացնելու հարցերը»,-ասված է հաղորդագրության մեջ։

Նիստում որոշվել է ԱՊՀ պետությունների ղեկավարների խորհրդի քննարկմանը ներկայացնել Համագործակցության անդամ պետությունների՝ արտաքին սահմանների վրա սահմանային անվտանգության ամրապնդման նպատակով 2026-2030 թվականներիհամագործակցության ծրագրի նախագիծը։

Հանդիպմանը, որը նախագահում էր ՌԴ ԱԴԾ սահմանային ծառայության պետ, բանակի գեներալ Վլադիմիր Կուլիշովը, մասնակցում էին Ադրբեջանից, Բելառուսից, Ղազախստանից, Ուզբեկստանից, Ղրղզստանից, Ռուսաստանի Դաշնությունից, Տաջիկստանից, Թուրքմենստանից ժամանած պատվիրակները, ԱՊՀ գործադիր կոմիտեի, անդամ պետությունների Համագործակցության հակաահաբեկչական կենտրոնի, ինչպես նաև Հավաքական անվտանգության պայմանագրի կազմակերպության քարտուղարության և Շանհայի համագործակցության կազմակերպության Տարածաշրջանային հակաահաբեկչական կառույցի գործադիր կոմիտեի ներկայացուցիչներ։