Նոր «զենք»՝ պատերազմի մասնակից տղաներին․ ՀԵՆՔ-ի կրթական ծրագով ուսումնառության արդյունքում տղաներն ավարտական վկայագրեր ստացան (լուսանկարներ, տեսանյութեր)

Հուլիսի 4-ին հայ-ռուսական համալսարանում տեղի ունեցավ 44-օրյա պատերազմի մասնակիցների, կամավորների, հաշմանդամություն ձեռք բերած զինվորների, ինչպես նաև Արցախից բռնի տեղահանված և զոհվածների ընտանիքների անդամների համար իրականացվող կրթական ծրագրի ավարտական վկայագրերի հանձնման արարողություն: 

Կրթական այս ծրագիրը հիմք է դրվել 2021 թվականին՝ 44-օրյա պատերազմից հետո, երբ կռվից տուն վերադարձած զինվորներն առավել քան աջակցության կարիք ունեին։

Այդ է պատճառը, որ «ՀԵՆՔ» համազգային բարեգործական հիմնադրամի աջակցությամբ «ՄՏՔԻ ԶԱՐԿ» ՀԿ-ի կողմից իրականացվող «Տեղեկատվական տեխնոլոգիաների ուսուցման դասընթացներ»  ծրագիրը մինչ օրս գործում է անխափան՝ նորանոր ուսանողներ ընդգրկելով իր շարքերը։

Հատկանշական է, որ կրթական այս ծրագրի արդյունքում, կազմակերպությունն ավարտած ուսանողներին օգնում է նաև ռեալիզացնել իրենց ուժերը Հայաստանում ու ՀՀ սահմաններից դուրս գործող տարբեր ընկերություններում։ 

Այլ կերպ ասած՝ լուծվում է նաև ավարտականների զբաղվածության խնդիրը։

ՀԵՆՔ-ի աջակցությամբ իրականացվող կրթական այս ծրագրում ընդգրկված բոլոր ուսանողները միավորվել են մի գաղափարի շուրջ՝ անել ամեն ինչ, որպեսզի կարողանան իրենց լուման ներդնել երկրի վաղվա օրվա համար։

Նրանց դիտարկմամբ` կրթությունը, որն այսօր ստանում են՝ զենք է, որը կարող է մեծ դերակատարում ունենալ երկրի հզորացման համար։

Անգամ կարգախոս են մտածել, որը հնչում է ճիշտ այսպես․ ՀԵՆՔ՝ արդի ուսման հզոր զենք։

Ինչ վերաբերում է ավարտական վկայագրերի հանձնման արարողությանը, ապա այն սկսեց համալսարանի բակից, որտեղ տեղադրված է պատերազմում հերոսաբար ընկած զինվորների հիշատակին նվիրված հուշաքար։

Ուսանողները, դասախոսներն ու միջոցառման հյուրերը, քահանաների ուղեկցությամբ եղան հուշաքարի մոտ, որտեղ ծաղիկներ խոնարհելուց հետո, աղոթք բարձրացվեց առ Աստված՝ մարտում ընկած տղերքի հիշատակը հավերժացնելու համար։

Նկարում՝ Օրհնության կարգ՝ զոհերի հիշատակին նվիրված հուշաքարի մոտ․

Արդեն դալիճում, բացման խոսքով հանդես եկավ ՀԵՆՔ-ի նախագահ, Արցախյան առաջին պատերազմի մասնակից, փոխգնդապետ Արմեն Բայրամյանը։ Նա ներկայացրեց, թե ինչպես մտահղացավ կրթական կազմակերպության ստեղծման գաղափարը, ինչպես զարգացավ այն ու ինչ արդյունք ունեն այսօր։

Նկարում՝ Արմեն Բայրամյանը․

Միջոցառումը վարում էր 44-օրյայի մասնակից Էդմոնդ Հովակիմյանը, ով պատերազմի հետևանքով զրկվել է թևից։ Նրա համար այդ օրը յուրահատուկ էր այնքանով, որ նրա ծննդյան օրն էր։  ՀԵՆՔ-ի տնօրեն Լիլիթ Սահակյանն Էդմոնդի համար անակնկալ էրն պատրաստել։

Էդմոնդ Հովակիմյանը խոստովանեց, որ այս ծննդյան օրը մյուսներից տարբերվեց ու այդ մասին նա երկար կհիշի։ Էդմոնդը միջոցառման ժամանակ հանդես եկավ «Հերոս տղերքը» երգի կատարմամբ (տեսանյութը՝ այստեղ)։

Իր «Շնորհակալ եմ» երգով ելույթ ունեցավ նաև երգիչ, երգահան Դավիթ Ամալյանը, ում որդին՝ Վարդան Ամալյանը հերոսաբար ընկել է հայրենիքի համար մղված 44-օրյա պատերազմում։

Միջոցառման ժամանակ իր ելույով հանդես եկավ նաև հանդիսավար Արսեն Մանուկյանը։ Նա կարդաց իր ստեղծագործություններից մեկը, որը նվիրել է պատերազմի մասնակից հերոսներին։

Իրենց հրաշալի կատարումներով ելույթ ունեցան հայ երգչուհի (սոպրանո), ազգային և միջազգային բազմաթիվ մրցույթների դափնեկիր, ՀՀ վաստակավոր արտիստ Աննա Մայիլյանն ու «Արամ Խաչատրյան տրիո»-ի դաշնակահար, Երևանի Կոմիտասի անվան պետական կոնսերվատորիայի պրոֆեսոր, Արամ Խաչատրյանի տուն-թանգարանի տնօրեն Արմինե Գրիգորյանը։

Նկարում՝ Արմինե Գրիգորյան

Նկարում՝ Աննա Մայիլյան

Միջոցառման ընթացքում կազմակերպվեց շնորհակալագրերի և պատվոգրերի հանձնման արարողություն։ Բոլոր նրանք, ովքեր ինչ-որ կերպ նպաստել են կազմակերպության առաջխաղացմանն ու աջակցել ուսանողներին ուսումնառության հարցում՝ խրախուսվեցին շնորհակալագրերով։

 Միջոցառման ավարտին տեղի ունեցավ օրհնության կարգ։

Արմինե Մկրտումյան