Եթե մենք պայքարում ենք Այգեզարդում հանք չբացելու համար, իսկ կողքը 2 անգամ ավելի մեծ մակերեսով հանք է բացվում՝ մեր ամբողջ աշխատանքն ընկնում է ջուրը․ Արփինե Խաչատրյան
Վեդի խոշորացված համայնքի Գինեվետ բնակավայրում հուլիսի 10-ին Վեդիում ցեմենտի գործարանի կառուցման աղմկահարույց նախագծի շուրջ 4-րդ հանրային լսումներն իրականացնելու համար ՏԻՄ-ը չի ապահովել բավարար պայմաններ՝ բոլոր շահագրգիռ կողմերի պատշաճ ներգրավման համար։
Հանրային լսումները հսկել են ոստիկանները՝ համայնքի ու հարևան բնակավայրերի բնակիչներին թույլ չտալով մասնակցել դրանց։ Պատճառաբանել են, թե դահլիճում տեղ չկա։
Գինեվետի գյուղապետարանում անցկացվող հանրային լսումներին համայնքի բնակիչներից մասնակցել են միայն համայնքապետարանի աշխատակիցները։
Այսօր հրավիրված մամուլի ասուլիսին Այգեզարդ գյուղի նախաձեռնող խմբի համակարգող Արփինե Խաչատրյանն ասաց, թե 4-րդ հանրային լսման մասին իմացել է պատահաբար՝ ՇՄՆ կայքից։
«Եթե մենք պայքարում ենք Այգեզարդում հանք չբացելու համար, հավաքել ենք գյուղի գերակշիռ մասի ստորագրությունները, իսկ կողքը երկու անգամ ավելի մեծ մակերեսով հանք է բացվում, ստացվում է, որ մեր ամբողջ աշխատանքն ընկնում է ջուրը։ Մենք չենք կարող այս նախագծի նկատմամբ անտարբեր մնալ։ Լսումներից մեկ օր առաջ Արտաշատի համայնքապետարանից նամակ եկավ, որ մենք որպես շահագրգիռ կողմ կարող ենք մասնակցել և դիրքորոշում հայտնել»,-հայտնեց Արփինե Խաչատրյանը։
Մինչդեռ, ըստ նրա, լսումներից երկու ժամ 5 րոպե առաջ ոստիկաաները փակել են մուտքը և ասել, թե ներսում տեղ չկա, դահլիճը լցված է։
«Բացահայտ խտրականություն է, այնինչ մենք նախարարությունից նամակ էինք ստացել, որ Այգեզարդի և Քաղցրաշենի բնակիչները կարող են մասնակցել և դիրքորոշում հայտնել։ Սկզբից կարծում էինք, թե խտրականությունը այգեզարդցիների և գինեվետցիների մեջ են դնում, այնինչ, իրենք մանրակրկիտ ուսումնասիրել էին, թե ովքեր են դեմ և «ռենտգեն» անելով էին թույլ տալիս, թե ով մտնի դահլիճ։ Տեսանյութերով մենք տեսել ենք, որ դահլիճում տեղ կար»,-ասաց Խաչատրյանը։
