Սիրունացել եմ․ Մամիկոն Ասլանյանը՝ իր հետ տեղի ունեցած փոփոխության և առաջիկա անելիքների մասին
2 տարի 7 ամիս անազատությունից հետո, քաղբանտարկյալ Մամիկոն Ասլանյանի խափանման միջոցը փոխվել է. դատարանի որոշմամբ նա ազատ արձակվեց 10 մլն դրամ գրավով։ «Վարդաշեն» ՔԿՀ դիմաց հավաքվածները նրան դիմավորեցին ծափահարություններով։
Լրագրողների հարցին, թե ինչ է փոխվել նրա մոտ այս տարիների ընթացքում, Մամիկոն Ասլանյանն առանց հապաղելու, կեսկատակ-կեսլուրջ, պատասխանեց․ «Սիրունացել եմ»։
Լրագրողներից մեկը հետաքրքրվեց, թե՝ կառաջադրվի՞ Մամիկոն Ասլանյանը որպես քաղաքապետի թեկնածու, ու եթե ոչ, ապա ինչո՞ւ։ Այս հարցի ձևակերպումը դուր չեկավ Ասլանյանին․ «Ո՞վ ասեց` ոչ, որ հարցնում եք՝ ինչու»,- ասաց նա։
Ասլանյանը նշեց, որ 2 տարի 7 ամիս զրկված է եղել հանրության հետ լայն շփումներից ու պետք է խորհրդակցի իր թիմակիցների հետ։
«Պետք է խորհրդակցենք, հասկանանք, թե այս իրավիճակի անունն ինչ է։ Ես պաշտոնի կռիվ չեմ տվել, որ ասեմ՝ պաշտոնն ինձանից տարել են։ Ամեն ինչ արել են, որպեսզի ես չստանձնեմ։ Հիմա պետք է հասկանանք, թե ինչ ենք անելու»,- ասաց Ասլանյանը։
Նա շնորհակալություն հայտնեց այն մարդկանց, ովքեր այս ընթացքում լուսաբանել են քաղբանտարկյալների գործերը և շուտափույթ ազատություն մաղթեց ՀՀ բանտերում գտնվող քաղբանտարկյալներին և Բաքվի բանտերում գտնվող մեր հայրենակիցներին։
