Շան հարձակումից տուժած երեխային վիրահատել են․ նոր մանրամասներ
Երեկ՝ հուլիսի 16-ին, Ոսկեհասկ գյուղում շունը հարձակվել է մոր և աղջկա վրա, որոնց տեղեփոխել են հիվանդանոց։
Oragir.News-ը կապ հասատեց Ոսկեհասկ գյուղի վարչական ղեկավար Մուշեղ Սահակյանի հետ, ով մեզ հետ զրույցում ներկայացրեց դեպքի մանրամասները։
«Ես համայնքապետարանում եմ եղել, զանգեցին ասացին, որ շունը հասել է ժողովրդի վրա։ Անհապաղ գնացել եմ գյուղ։ Ընթացքից տեղեկացա, որ բոլորին տեղափոխում են հիվանդանոց։ Ճանապարհին նրանց դիմաց դուրս եկանք, միասին տեղափոխեցինք հիվանդանոց։
Մայրը ու երեխան հյուր էին գնում, հետ գալուց՝ շունը հարձակվել է։ Մայրը օգնություն է կանչել, գյուղացիները հասել են օգնության»,- ասաց նա։
Մուշեղ Սահակյանը նաև նշեց, որ թափառական շների հարցով վաղուց էին զբաղվում։
«Որ ասեմ՝ ահավոր վիճակ է, շները շատ են մեզ մոտ, սուտ կլինի։ Բայց շուն են ամեն դեպքում։ Պետք է այդ հարցով զբաղվել, արդեն ընթացքի մեջ է։ Բնակավայրերից հերթականությամբ շներին հեռացնելով գալիս են»,-նշեց նա։
Վարչական ղեկավարի տեղեկություններով՝ վիրավոր երեխային տեղափոխել են Երևան, իսկ մնացածին Գյումրու ԲԿ։
Մեր տեղեկություններով՝ երեխան, ով ուներ վնասվածքներ քթի շրջանում և դեմքի հատվածում՝ գիշերը վիրահատել են։ Մնացած քաղաքացիները արդեն դուրս են գրվել։
Հիշեցնենք, որ հուլիսի 16-ին, արտակարգ դեպք էր տեղի ունեցել Շիրակի մարզում։ Ժամը 16։40-ի սահմաններում ՀՀ Ներքին գործերի նախարարության ոստիկանության Շիրակի մարզային վարչությունում և ոստիկանության Ամասիայի բաժնում օպերատիվ տեղեկություններ են ստացվել, որ Ախուրյան խոշորացված համայնքի Ոսկեհասկ գյուղում շունը հարձակվել է քաղաքացիների վրա և կան տուժածներ։
