ԿԳՄՍ նախարարն ու ԵՄ դեսպանը ծանոթացել են «Ստեղծագործ Եվրոպա» հայաստանյան գրասենյակի գործունեությանը

ՀՀ ԿԳՄՍ նախարար Ժաննա Անդրեասյանը և Հայաստանում Եվրոպական միության պատվիրակության ղեկավար, դեսպան Վասիլիս Մարագոսն այսօր այցելել են «Ստեղծագործ Եվրոպա» հայաստանյան գրասենյակ, ծանոթացել 2023 թվականի ընթացքում իրականացված աշխատանքներին և առաջիկա ծրագրերին: Այդ մասին հայտնում են ԿԳՄՍՆ-ից:

Գրասենյակ այցին մասնակցել են նաև ԿԳՄՍ նախարարի տեղակալներ Արթուր Մարտիրոսյանը և Դանիել Դանիելյանը:

Այցի շրջանակում «Ստեղծագործ Եվրոպա» հայաստանյան գրասենյակի ղեկավար Սոնա Հարությունյանը ներկայացրել է կատարված հիմնական աշխատանքները:

Ծրագրի համակարգող Անի Հովսեփյանը ներկայացրել է գրասենյակի աշխատանքներն՝ ըստ ուղղությունների և ձեռք բերված արդյունքների։

Նշվել է, որ 2023 թվականից 2024 թվականի հուլիս ընկած ժամանակահատվածում վերաթողարկվել է www.creativeeurope.am կայքէջը, ստեղծվել են էջեր սոցիալական հարթակներում՝ Facebook, Instagram, LinkedIn: Ավելի քան 80 կազմակերպության և անհատ ստեղծագործողների հետ տեղի են ունեցել անհատական հանդիպումներ, ստեղծվել է պարբերաբար թարմացվող տեղեկատվական բազա (թանգարաններ, փառատոներ, թատրոններ, գրադարաններ, հրատարակիչներ, արվեստի գործիչներ և այլն)։

Նշյալ ժամանակահատվածում մոտ 10 հայտադիմում է ներկայացվել ԵՄ «Մշակույթ» բաժնի համագործակցության միջին և մեծ նախագծերին, «Culture moves Europe» անհատական շարժունակության ծրագրով ներկայացվել է 30 խմբային և անհատական հայտ։ Մասնակցություն է ապահովվել նաև Եվրոպական փառատոների ասոցիացիաների դրամաշնորհին՝ ներկայացնելով 3-ից ավելի հայտ: Հայաստանից հաղթել է «Երևան մյուզիք ուիք» նախագիծը։ Ամփոփվել են նաև 2024 թվականի Perform Europe ծրագրի արդյունքները: Կատարողական արվեստի 42 գործընկերության շուրջ 2,1 միլիոն եվրոյի աջակցություն կտրվի՝ տարատեսակ ծրագրեր իրագործելու և «Ստեղծագործ Եվրոպայի» երկրներում կատարողական արվեստի գործերի տարածման նպատակով:

ՀՀ ԿԳՄՍ նախարար Ժաննա Անդրեասյանը շնորհակալություն է հայտնել «Ստեղծագործ Եվրոպա» հայաստանյան գրասենյակի ներկայացուցիչներին կատարած աշխատանքի և գործադրած ջանքերի համար: ԿԳՄՍ նախարարը շնորհակալություն է հայտնել նաև Հայաստանում ԵՄ պատվիրակությանն՝ ի դեմս դեսպան Վասիլիս Մարագոսի, արդյունավետ համագործակցության համար, որի շնորհիվ եվրոպական ամենատարբեր հարթակներում ապահովվում է Հայաստանի մասնակցությունը:

«Առաջընթացն իսկապես նկատելի է, ինչը շատ կարևոր է: Առաջնային ենք համարում ավելի մեծ թվով մասնակցության հայտերի ներկայացումը և այս առումով պետք է հասկանանք, թե որոնք են այն հիմնական մարտահրավերներն ու խնդիրները, որոնց բախվում են ծրագրերին դիմողները»,- ասել է նախարարը:

Նրա խոսքով՝ նախարարությունը պատրաստակամ է քննարկելու այս ուղղությամբ աջակցության բարելավումը, որն էլ ավելի կընդլայնի ծրագրին Հայաստանից մասնակցության հնարավորությունները և կապահովի ավելի բարձր մասնակցություն մարզերից։

ԿԳՄՍ նախարարը կարևորել է նաև երիտասարդ ստեղծագործողների և խմբերի կողմից ներկայացվող ծրագրերի և նախաձեռնությունների՝ ՀՀ մշակույթի պահպանության, զարգացման և հանրահռչակման 2023-2027 թթ. ռազմավարությանը համահունչ լինելը:

«Առաջնային է ավելի մեծ թվով ստեղծագործողների ներգրավվածությունը և մասնակցության ապահովումը: Ընդ որում՝ մասնակիցները միևնույն թեմայի շուրջ կարող են համատեղ հայտ մշակել, ինչը, կարծում եմ, կբարձրացնի հաղթելու հնարավորությունները»,- ասել է ԿԳՄՍ նախարարը:

ԵՄ պատվիրակության ղեկավար Վասիլիս Մարագոսը ևս ողջունել է ներկաներին և շնորհակալություն հայտնել կատարած աշխատանքի համար՝ ընդգծելով մշակույթի ոլորտում Հայաստանի հետ համագործակցության արդյունավետությունը:

««Ստեղծագործ Եվրոպայի» գրասենյակների աշխատանքներն ուղղված են նպաստելու եվրոպական մշակութային տարածքում միջմշակութային կապերի զարգացմանը, ծրագրի մասին տեղեկացվածության բարձրացմանը, մշակութային կառույցների և անհատների կարողությունների զարգացմանը, գործընկերային կապերի հաստատմանը: Վստահ եմ՝ համատեղ աշխատանքի արդյունքում կնպաստենք այս նպատակների իրականացմանը»,- ասել է Վասիլիս Մարագոսը:

«Ստեղծագործ Եվրոպա» հայաստանյան գրասենյակը գործում է 2023 թվականից՝ «ՀՀ և ԵՄ միջև «Ստեղծագործ Եվրոպա» ծրագրին (2021-2027) Հայաստանի Հանրապետության մասնակցության մասին» համաձայնագրի հիման վրա, որը վավերացվել է 2022 թ. դեկտեմբերին:

Նշենք՝ օգոստոսի 1-ին մեկնարկելու է Culture moves Europe ծրագրի մասնակիցների նոր կանչը: Ծրագիրը տրամադրում է շարժունության դրամաշնորհներ արվեստագետներին և մշակույթի ոլորտի մասնագետներին՝ ճարտարապետության, մշակութային ժառանգության, դիզայնի և նորաձևության, գրական թարգմանության, երաժշտության, կատարողական արվեստի և վիզուալ արվեստի ոլորտներում: