Աղբահանության գարշահոտը գալիս է համակարգը ղեկավարողից․ Երևանի թիվ 85 դպրոցի հարևանությամբ աղբը ընդլայնել է իր աշխարհագրությունը (լուսանկարներ, տեսանյութ)

Որքան էլ խոսեն աղբահանության բարձր մակարդակի մասին, այնուամենայնիվ, Երևանի մի շարք վարչական շրջաններում, այդ թվում` Երևանի Քանաքեռ- Զեյթուն վարչական տարածքում աղբահանությունը պատշաճ մակարդակով չի իրականացվում։

Համենայնդեպս, Քանաքեռում գտնվող թիվ 85 դպրոցի հարևանությամբ տեղադրված աղբարկղերը չեն դատարկվում ու, բնակիչների կողմից թափվող աղբը ընդլայնել է իր աշխարհագրական տարածքը։

Այս տարածքից աղբն սկսել են այնքան ուշ-ուշ տանել, որ աղբամանների շուրջն աղբակույտեր են հավաքվել ու գարշահոտությամբ լցրել ամբողջ տարածքը։

Այնպես է ստացվել, որ այս ճանապարհով հաճախ եմ անցնում ու, եթե ոչ ամեն օր, ապա ժամանակ առ ժամանակ հանդիպում եմ այն տեսարանին, որը տեսնում եք ստորև տեղադրված տեսանյութում։

NEWSPRESS.am-ը բազմիցս անդրադարձել է աղբահանման համակարգի բացթողումներին։ 

Հրապարակման մեջ անդրադարձել էինք այն իրողությանը, որ աղբը հաճախ ժամանակին չի հեռացվում աղբատարներրի անմխիթար վիճակի պատճառով։ Ի դեպ, հրապարակել ենք նաև փաստեր, որ ՊՈԱԿ-ի նախկին տնօրեն Հովհաննես Մանուկյանն ու նրա «հավատարիմ ենթակաները», շարունակ վատնել են ՊՈԱԿ-ի ֆինանսները  (ներկայացրել ենք փաստաթղթեր, թե կոնկրետ ինչ կեղծարարություններ են կատարվել)։

Երևանի քաղաքապետարանի գործակարգավարական խորհրդակցության ժամանակ, փոխքաղաքապետ Տիգրան Ավինյանն ինքը խոստովանեց, որ աղբահանության թերացումները կապված են տեխնիկայի հետ։

Չի բացառվում, որ գուցե նաև դա էր պատճառը, որ Հովհաննես Մանուկյանին հեռացրեցին տնօրենի պաշտոնից, բայց նրա հեռացմամբ, ինչպես երևում է, խնդիրը չլուծվեց։

Այնպես որ, Երևանի քաղաքապետարանի ու, մասնավորապես, Տիգրան Ավինյանի ուշադրությունն ենք հրավիրում կոնկրետ հասցեում նշված աղբատարներից աղբի հեռացման խնդիրն ու տեղեկացնում, որ սա միակ տարածքը չէ, որը հայտնվել է բարձիթողի վիճակի (թեև հազիվ թե Ավինյանը տեղյակ չլինի)։

Հարկ է նաև նկատել, որ Հովհաննես Մանուկյանից հետո այս համակարգը տնօրինեց  Բագրատ Աղաջանյանը, ով, մեր տեղեկություններով, իրականում  ինչպես ասում են, որպես «քուչի տղա», Ավինյանին քաղաքապետ դառնալու համար, խոստացել է 20 000 (քսան հազար) ձայն (քվե)։

Ապահովեց, թե ոչ՝ ինքը գիտի ու Ավինյանը, բայց փաստն այն է, որ Աղաջանյանը ևս երկար չմնաց այս պաշտոնին։ Այժմ ՊՈԱԿ-ը ղեկավարում է Սաշա Կատվալյանը, ով նախկինում է վարչական շրջանի ղեկավար էր։

Այլ կերպ ասած` Ավինյանը փոխանակ լուծի համակարգային խնդիրն ու քաղաքը մեկընդմիշտ մաքրի աղբից, իրար հետևից փոխում է ՊՈԱԿ-ի ղեկավարներին, ովքեր մեկը մյուսից անտեղյակ է ոլորտին առնչվող հարցերին։ Մինչդեռ հարկավոր է ՊՈԱԿ-ը հանձնել բանիմաց մեկին ու ապահովել ֆինանսավորմամբ։

Մի խոսքով` աղբահանության գարշահոտությունը գալիս է համակարգը ղեկավարողից։

Արմինե Մկրտումյան