Կանչենք տնտեսվարողին, ասենք՝ դու 120 դրամով առնում ես, արի 50 դրամով ներքին շուկայում գազ վաճառի՞․ ՄՊՀ նախագահը՝ հեղուկ գազի թանկացման մասին
«Հեղուկ գազի շուկայում բորսայի գները բարձրացել են, ընդհանրապես աշխարհում ներկրվող ապրանքի գները բարձրացել են, այդ իսկ պատճառով նաև մեր ներքին շուկայում են գները բարձրացել»։ Այս մասին կառավարության նիստից հետո լրագրողներին ասաց ՀՀ մրցակցության պաշտպանության հանձնաժողովի նախագահ Գեղամ Գևորգյանը։
Նա նշեց, որ վերջին թարմացված տեղեկատվությամբ արդեն հեղուկ գազ ներմուծող ընկերությունների քանակը 98 է դարձել, որևէ մեկի մասնաբաժինը 10 տոկոսը չի գերազանցում։
«9-10 տնտեսվարող սուբյեկտների մասնաբաժինը 4-5 տոկոսի մեջ է, մնացածներն ավելի փոքր են։ Սա մեկ հերքում, որ փոքր տնտեսվարող սուբյեկտները դուրս են եկել, դրա համար է թանկացել հեղուկ գազը»,- ասաց Գ.Գևորգյանը։
Նա նշեց, որ տնտեսվարող սուբյեկտների քանակը բավականին շատ է և շուկան ցածր կենտրոնացաված է, բայց տեսել են, որ բորսայում գները բարձրացել են։
«Բացեք օրենսդրությունն ու կարդացեք, տեսեք՝ գրա՞ծ է, որ ցածր կենտրոնացված շուկայում դուք կարող եք գին թելադրել։ Իսկ ձեր ուզածն ի՞նչ է, որպեսզի մենք սկսենք գին սահմանել, կանչենք տնտեսվարողին, ասենք՝ դու 120 դրամով առնում ես, արի 50 դրամով ներքին շուկայում գազ վաճառի՞։ Եվ կվաճառի՞ այդ տնտեսվարող սուբյեկտը»,-ասաց Գևորգյանը;
Ինչ վերաբերում է բենիզնի շուկային, որտեղ գների նվազում է նկատվում, նա ասաց, որ գործընթաց է, որը շուտով կավարտեն։
«Կարծում ենք՝ այնտեղ առերևույթ չարաշահում եղել է։ Առերևույթ բառը շեշտում եմ։ Բայց վերջնական որոշում չկա, որպեսզի հստակ ասենք»,- նշեց նա։
