Եթե իմ դեմ կատարվող հանցագործությունները չեն բացահայտվում, ես կարո՞ղ եմ մտածել, որ դրա հովանավորը հենց Դուք եք, Վահե Ղազարյան. Արիանա Հովսեփյան

Շուրջ 20 օր առաջ NEWSPRESS.am լրատվական կայքում գրությամբ դիմել էի ՀՀ Ներքին գործերի նախարար Վահե Ղազարյանին, որով խնդրել ու պահանջել էի բացահայտել ու պատասխանատվության ենթարկել ֆեյսբուքյան «Tej Lurer» էջը (https://www.facebook.com/anna.avagyan.3994) շահագործողին:

Վահե Ղազարյանի ներդրված ջանքն ու եռանդը սահմանափակվել է այնքանով, որ այդ էջն արգելափակվել է: Ընդամենը: Թե ով է այն շահագործում, ամբողջ համակարգի ղեկավարը բացահայտել տալ չի կարողացել: Ունակ չէ: Հասկանո՞ւմ եք: 

Տեղի ունեցածի շարունակությունը եղել է այն, որ, հավանաբար, հենց նշված ֆեյսբուքյան էջը շահագործողներն իրենց կեղտոտ նպատակներն իրագործելու համար սոցիալական մեկ այլ հարթակում` «Տիկտոկ»-ում բացել են էջ` @skandal_news1 անվամբ ու շարունակում են ապօրինի կերպով իմ անձնական բնույթի խոսակցությունները հրապարակելը:

Սա, կրկնում եմ, Վահե Ղազարյանի` որպես համակարգի ղեկավարի կամ թուլության կամ շատ ավելի վատ` մեղավորության մասին է խոսում: 

Եթե Ներքին գործերի նախարարը հետևողականորեն չի բացահայտում այս կիբերհանցագործությունը, ապա ես կարո՞ղ եմ մտածել, որ հենց ինքն է հովանավորում իմ դեմ մեկնարկած այս արշավը: Վստահաբար, իրավունք ունեմ այդպես կարծելու: Մանավանդ, որ չար լեզուներն ասում են, թե Վահեի համար գիշերները լուսանում են հեռախոսով խոսելով: 

Այս կիբերհանցագործությունները միակը չեն, որ կատարվել են իմ դեմ: Հիշեցնեմ, որ դեռ նախորդ տարի` 2023-ի հունիսի 6-ին, մտնելով իմ տուն, այն տակնուվրա եղած գտա: Մինչ օրս այդ հանցագործությունը Վահե Ղազարյանի ղեկավարած կառույցը բացահայտել չի կարողանում: Կամ չի ուզում: 

Փոխարենն այս ամբողջ ընթացքում ոստիկանները մեծ հաջողությամբ հսկում են քաղաքական ղեկավարության անդորրը, հսկում են, որ սակրավորները հաջողությամբ ականազերծեն տավուշեցի Վահե Ղազարյանի հայրենի Տավուշը, համապատասխան լուրերն էլ տարածվեն, թե Վահեն ծանր է տանում հայրենիքի հանձնումը: Իսկ Վահեն, այդ ընթացքում, մեծ պարգևավճարներ է տալիս ոստիկաններին, որ լավ հսկեն հանձնումը, Երևանի կենտրոնում լավ կրակեն մարդկանց վրա: Որ ինքը դուր գա դասարանցի Նիկոլին ու մնա աթոռին ու տեր իր ունեցած միակ անշարժ գույքին...  

Վերադառնալով բուն ասելիքիս` գնդակը Վահե Ղազարյանի դաշտում է ու ճիշտ ուղղությամբ այն չնետելու պարագայում, հենց այդ դաշտում էլ պայթելու է, իր հետ օդ բարձրացնելով տարատեսակ ճշմարտությունների ցավոտ բեկորները...

Շարունակելի...

Արիանա Հովսեփյան