ԱԺ Էթիկայի հանձնաժողովը չի վերածվի Լինչի դատաստանի. Խոսրով Հարությունյան. (տեսանյութ)

ԱԺ ՀՀԿ խմբակցության պատգամավոր Խոսրով Հարությունյանը կարծում է, որ հայ-թուրքական հարաբերությունների հարցում կողմերի տարբեր մոտեցումներն առանձնահատուկ մեծ չեն: Այս մասին նա ասաց «Անդրադարձ» մամուլի ակումբում լրագրողների հետ զրույցում:

Ըստ պատգամավորի`պետք է հասկանալ, որ կողմերը լիարժեք ընդունում և սատարում են կառավարության գործունեության ծրագիրը, որը ձևավորված էր Սերժ Սարգսյանի և ՀՀԿ կուսակցության նախընտրական հենքի վրա. «ՀՅԴ-ն մեծ իմաստով իր համաձայնություն է տալիս այս ծրագրին, իսկ մնացած հարցերում հայ-թուրքական արձանագրությունների ապագային ՀՅԴ-ն հնարավորություն կունենա անդրադառնալ»,-ասաց նա:

Խոսրով Հարությունյանը անդրադարձավ նաև այն հարցին, որ ԱԺ էթիկայի հանձնաժողովը էթիկապես խախտում չի ճանաչել ՀՀԿ խմբակցության պատգամավոր Շուշան Պետրոսյանի արարքի մեջ, երբ վիրավորել էր օգտատերին և ասել, թե աչքերը կհանի: Խոսրով Հարությունյանը, ով նաև Էթիկայի հանձնաժողովի նախագահն է, ասաց, թե որոշման համար հիմք է ընդունվել այն, որ Շուշան Պետրոսյանի խոսքը սպառնալիք չի պարունակել, այլ միայն սաստելու միտում է ունեցել: Ըստ նրա՝ հանձնաժողովը չպետք է պատագամավորներին Լինչի դատաստանի ենթարկի:

ԱԺ պատգամավորը վստահ է, սա նախադեպ չի կարող լինել մյուս պատգամավորների համար, քանի որ այս դեպքում երկու հարց կար, թե որքանով է սպառնալիք և ֆիզիկական հաշվեհարդար տեսնելու ռեալ մտադրություն և մյուսը՝ արդյո՞ք վիրավորանք էր, թե՝ չէ: Նրա խոսքով՝ հստակ է, որ սպառնալիք չէր, իսկ վիրավորանք էր, թե՝ չէ դա արդեն իրենց հանձնաժողովի գործը չէ: «Վիրավորանքը մեր հանձնաժողովի իրավասությունից դուրս է և իրավական խնդիր է, թե ոչ դատարանն է տալիս, օգտատերը ազատ է դիմել դատարան»,-ասաց նա և հավելեց, թե այլ հարց կլինի, եթե  հանձնաժողովի գործառույթները օրենսդրորեն ավելի ընդլայնեն:

Մանրամասները՝ տեսանյութում