Կհարցնի ինչ-որ մեկին, ինչ-որ մեկը կնայի ու կասի․ Դևոյանը չի հասկանում, թե ինչու չի կարող տարիքով տաքսիստն օգտվել էլեկտրոնային համակարգից

ԱԺ «Հայաստան» խմբակցության  պատգամավոր Գեղամ Նազարյանն իր գործընկերներին պպատմեց, թե ինչպես երեկ տաքսու մի վարորդի է հանդիպել, ով դժգոհել է ԱԺ նոր որոշումից․ վերջնիս համաձայն՝ սեպտեմբերի 1-ից ՀՀ տարածքում մարդատար տաքսիներով ուղևորափոխադրումներ իրականացնելու համար պարտադիր է միանալ ՊԵԿ էլեկտրոնային համակարգին և տրամադրել էլեկտրոնային հսկիչ դրամարկղային մեքենայի էլեկտրոնային կտրոն։

«Տաքսիստն ասում էր, որ 50 տարեկան մեծ մարդ է, այդ հարկային գործիքակազմին չիկարող տիրապետել, որովհետև հեռախոսից չի կարողանում օգտվել: Ինչ են անելու մարդիկ, որոնք չեն կարողանում համակարգից կամ հեռախոսից օգտվել»,-հարցրեց պատգամավորը՝ հանձնաժողովի նիստում:

ՔՊ-ական պատգամավոր Արփի Դավոյանի համար նրա հարցը անհասկանալի էր։ Նա չի հասկանում, թե ինչպես չեն կարող օգտվել հեռախոսից։

«Աշխարհը գնում է էլեկտրոնային ծանուցումների և քաղաքացիներն էլ նույնպես պետք է շահագրգռված լինեն: Հիմա այդպիսի մարդիկ չկան, որոնց տանը գոնե մեկ հատ սմարթֆոն չլինի, և որևէ մեկը չօգնի, չնայի: Տեսականորեն կհարցնի ինչ-որ մեկին, ինչ-որ մեկը կնայի ու կասի: Օրինակ, իմ հարևանը կասի՝ չի կարող, ես կնայեմ ու իրեն կասեմ: Բոլոր ծառայությունները մեծամասամբ էլեկտրոնային են դառնում, ավելի հարմարավետ է մարդկանց էլեկտրոնային ծառայություններից օգտվելը»,- ասաց Դավոյանը:

Միևնույն ժամանակ Դեվոյանը պնդեց, թե հասկանում է, որ կլինի մեկը, ում հետաքրքիր չէ էլեկտրոնային համակարգը, բայց, ըստ նրա, այդպես չի լինի;

«Կասի թուղթը բերեք, տվեք, մի հատ էլ կարդացեք բարձրաձայն, ձեռքիցս էլ բռնած տարեք ընտրության: Այդպես չի լինի: Հետո, 50 տարեկանների մասին շատ վատ կարծիք ունեք, բոլորը երիտասարդ են և զարգացած: Ես կարծում եմ՝ դրանք լուծելի հարցեր են ու կրիտիկական չեն»,-ասաց ՔՊ-ական պատգամավորը։