Բոլոր տղամարդիկ էլ պարտավոր են հայր լինել․ Գեղամ Նազարյանը Հայերերի տոնի կարիք չի տեսնում՝ բանակի օր ունենք

ԱԺ «Հայաստան» խմբակցության պատգամավոր Գեղամ Նազարյանը Հայրերի տոն մտցնելը հարված է համարում հայրերին ու տղամարդկանց համար։ Այդ մասին նա հայտարարեց ԱԺ պետական-իրավական հարցերի մշտական հանձնաժողովի նիստում, որտեղ որոշել են «Հայաստանի Հանրապետության տոների և հիշատակի օրերի մասին» ՀՀ օրենքում հունիսի 17-ը Հայրերի օր սահմանել։ 

Ըստ պատգամավորի, հայրերը նման տոնի կարիք չունեն։ 

«Եթե մայրերը տոն ունեն, ուրեմն հայրերն էլ ունեն, այս ամեն ինչից լավ հոտ չի գալիս»,-ասաց Նազարյանը՝ վստահություն հայտնելով, որ ոչ մի տղամարդ կողմ չի քվեարկի այս նախագծին։

«Հիմա լավագույն հայրն ո՞վ է. ով միայնակ պահել է  իր երեխաների՞ն, թե՞ լավագույն հայրը նա է, ով իր  երեխաներին կնոջ հետ միասին է լավ պահել։ Նման բան է առաջանալու հասարակության մեջ․ մեկ էլ  դասգրքերում տեսնելու ենք, որ լավագույն հայրը մի մարդ է, որը մեր մտածողության մեջ բոլորովին էլ լավագույն հայր չէ։ Նման վտանգներ եմ ես տեսնում այս ամեն ինչից»,- ասաց Գեղամ Նազարյանը։

Նա առաջարկեց դեմ քվեարկել ու հայրերին դրանով լավությունը անել։

«Կարծում եմ՝ որևէ տղամարդ կողմ չի լինի, որ հայրերի օր լինի։ Տղամարդու օրը բանակի օրն է»,-ասաց Նազարյանը։

Երբ նրան հիշեցին, որ բանակի օրը դա հայրերի օր չէ, Նազարյանն առարկեց․ «Բոլոր տղամարդիկ էլ պարտավոր են հայր լինել»։

Ներկաները հիշեցին երջանկահիշատակ Գալուստ Սահակյանին, ով մի առիթով ասել էր, թե բոլոր երեխաները պարտավոր են մեծանալ։