Եվրախորհրդարանում քննարկվելու է Արևմտյան Հայաստանում գտնվող հուշակոթողների հարցը

Եվրախորհրդարանում քննարկվելու է ցեղասպանության ժամանակ և դրանից հետո այսօրվա Թուրքիայի տարածքում գտնվող հայկական հուշարձանների ավիրման հարցը։ Տեղեկացնում է demokrathaber.net կայքը։

2016 թվականի մարտի 4-ից Բրյուսելում Եվրախորհրդարանի անդամները քննարկելու են Հայ ճարտարապետական ուսումնասիրության կենտրոն և Եվրոպայի արդարություն ու ժողովրդավարություն հայկական կազմակերպության առաջարկած հարցը։ Հարցը վերաբերում է ցեղասպանությանը Օսմանյան կայսրության և Թուրքիայի հանրապետության տարիներին, Թուրքիայի տարածքում գտնվող հայկական մշակութային օջախների հանդեպ իրականացված գործողություններին

32 մասից բաղկացած փաստաթղթում Վան, Մուշ, Կարս, Ուրֆա, Սվաս և այլ քաղաքներում ու բնակավայրերում հայկական կոթողների նկարներն ու նրանց վերաբերյալ տեղեկություններն են նշված լինելու։ Ներկայացվելու են կոթողների այժմյան անմխիթար, կիսաքանդ վիճակի նկարներ։

Հայկական ճարտարապետական կոթողների ուսումնասիրության կենտրոնի ղեկավար Սամվել Կարապետյանը նշել է, որ այժմ էլ շարունակվում է մշակութային ցեղասպանությունը։ Ժամանակին դրանք պայթեցվել են թուրքական բանակի կողմից, իսկ այժմ ոսկի որոնողները շարունակում են ավիրել հուշարձանները։ Նրա խոսքով` մինչև ցեղասպանությունը այսօրվա Թուրքիայի տարածքում եղել է մոտ 170 հազար հուշակոթող, որի միայն երկու երրորդն է կիսավեր վիճակում հասել մեզ։

ՅՈՒՆԵՍԿՕ-ի 1974 թվականի տեղեկության համաձայն 1923 թվականից հետո կանգուն 913 հուշակոթողներից 464-ը ընդհանրապես չկան, 252-ը կիսավեր վիճակում են, իսկ 197-ը շտապ վերանորոգման կաիք ունեն։

1987 թվականի դեկտամբերի 18-ին Եվրախորհրդարանը կոչով դիմել էր Թուրքիային ուշադրություն դարձնել հայկական հուշակոթողների պահպանությանը։ Սակայն մինչև այժմ շարունակվում է այն, ինչը վերջին 120 տարում իրականացվել է։