Կլիմայի փոփոխության և մարդու իմունիտետի միջև կապ է հայտնաբերվել

Կլիմայի փոփոխությունը և դրա հետևանքները՝ էկոհամակարգի խանգարումները կարող են լրջորեն ազդել ոչ միայն շրջակա միջավայրի, այլև մարդկային օրգանիզմի վրա։ Արդեն ապացուցված է, որ այդ բացասական գործընթացները մեծացնում են ալերգիայի և քրոնիկ հիվանդությունների ախտանիշները: Սկանդինավյան երկրներում բացահայտվել է ևս մեկ բացասական ազդեցություն։ Մի խումբ գիտնականներ վերլուծել են, թե ինչպես է ներքին միկրոբիոմի բաղադրությունն ազդում մարդու իմունիտետի վրա։ Պարզվել է, որ կլիմայական ճգնաժամի հետեւանքների պատճառով տներում փոխվում է միկրոբիոմը, ինչը նույնպես մեծացնում է ալերգիկ ռեակցիաների առաջացման վտանգը։
 

Այսօր մարդիկ իրենց ժամանակի մեծ մասն անցկացնում են տներում, գրասենյակներում, ուսումնական հաստատություններում: Փակ տարածքների միկրոբիոմն ազդում է մարդու ինքնազգացողության և առողջության վրա։ Այսպես, հայտնի է, որ այն երեխաները, ովքեր մանկուց ենթարկվել են «փողոցային» միկրոբիոտային, ավելի ուժեղ իմունիտետ ունեն և ալերգիայի զարգացման ռիսկը նվազում է: Սակայն «տնային» միկրոբիոտան կարող է տարբերվել «փողոցայինից» և այլ ազդեցություն ունենալ իմունային համակարգի վրա:
 

Գիտնականները վերլուծել են «տնային» միկրոբիոտայի բաղադրությունը 1038 առանձնատներում, որոնք գտնվում են սկանդինավյան հինգ քաղաքներում: Միկրոբիոտայի աղբյուրներ են եղել փոշին, ընտանի կենդանիները, իրենք՝ բնակիչները և տան տարիքը։ Միևնույն ժամանակ, միկրոբիոմի վրա կարող են ազդել նաև տան աշխարհագրական դիրքը և օդերևութաբանական պայմանները: Արդյունքում, գիտնականները հաստատել են, որ բազմազան «տնային» միկրոբիոտայի առկայությունը օգնել է նվազեցնել նման տան բնակիչների մոտ ալերգիկ ռեակցիաների զարգացման ռիսկը: Միևնույն ժամանակ, ասթմայի և ատոպիայի վտանգը լավագույնս նվազեցվել է տանը «փողոցային» միկրոբիոտայի ներկայացուցիչների առկայությամբ: Հետաքրքիր է, որ նման բակտերիաները ավելի քիչ են եղել Նորվեգիայի Բերգեն քաղաքի փակ տարածքում, որը բնութագրվում է առատ տեղումներով օրերի բարձր հաճախականությամբ և թույլ քամով (օդերևութաբանական տվյալները՝ տեղումներ, ջերմաստիճան, խոնավություն, քամու արագություն, վերլուծվել են երեք տարվա ընթացքում յուրաքանչյուր քաղաքի համար): Գիտնականները եզրակացրել են, որ նման եղանակային պայմանները պարզապես խանգարում են «փողոցային» միկրոբիոտայի ներթափանցմանը տներ։
 

Հետազոտողները նաև իրենց մտահոգությունն են հայտնել կլիմայի փոփոխության և գլոբալ տաքացման հետևանքով առաջացած ռիսկերի վերաբերյալ: Ենթադրվում է, որ այդ տարածքներում տեղումներով օրերի թիվը կարող է ավելանալ, և դա էլ ավելի ակտիվորեն կկանխի «փողոցային» միկրոբիոտայի ներթափանցումը տներ՝ չնայած սենյակների օդափոխությանը: Սա, իր հերթին, կարող է հետևանքներ ունենալ մարդկանց իմունային համակարգերի վրա, որոնք կարող են ավելի քիչ ընտելանալ բակտերիաների ավելի լայն տեսականիին:

Գիտնականնների թիմը կարծում է, որ հետագա հետազոտություններ են անհրաժեշտ՝ հասկանալու համար, թե ինչպես են օդերևութաբանական գործոնները ազդում փակ տարածքների բակտերիալ համայնքների վրա՝ կլիմայի փոփոխության լույսի ներքո: Արդյունքները հրապարակվել են Environmental Science & Technology ամսագրում: