Այ որ սրանց հավերժորեն ուղարկենք արձակուրդ, մեր ժողովուրդը կհասկանա, թե ինչ դժոխքի մեջ է եղել. Խաչիկ Մանուկյանը` կառավարության մասին

Կառավարության շենքը զվարճավայրի են վերածել: Հիշեք այն շրջանը, երբ կառավարության շատ անդամներ արձակուրդի մեջ էին, ինչ խաղաղ էր մեր երկիրը: Այ որ սրանց հավերժորեն ուղարկենք արձակուրդ, պատկերացրեք` մեր երկիրն ինչպես զարթոնք կապրի, մեր ժողովուրդը կհասկանա, թե ինչ դժոխքի մեջ է եղել: Այս մասին այսօր կառավարության շենքի դիմաց շտապ հավաքի ժամանակ ասաց գրող, հրապարակախոս, Արցախյան 44-օրյա պատերազմում անմահացած Վաչագան Մանուկյանի հայրը` Խաչիկ Մանուկյանը: 

«Ինչ վերաբերում է Արցախի տեղահանմանը, ապա ես ուզում եմ ավելի հետ գնալ. հիշեք 80-ականների ավարտը: Ովքե՞ր են հիմա վերաբնակեցումից խոսում` նրանք, ովքեր ցեղասպանություն իրագործեցին հայ ժողովրդի դեմ, Սումգայիթում, տարբեր վայրերում և միայն ռուսական ներկայությունը զսպեց, որպեսզի դրանք չհոշոտեն մեր հայրենակիցներին: Սա փաստն է, սա իրականությունն է: Իսկ հիմա մենք տեսնում ենք, որ այդ ցեղապանները կարողանում են հակառակը պնդել` ճանաչեք, որ այսինչ տեղը ցեղասպանություն եք գործել: Այսինքն` մենք հիմա հայտնվել ենք մի կարգավիճակում, որտեղ ոչ միայն պարտված ենք, այլև խեղված իրականության մեջ ենք, այլև մենք գնում ենք այդ սիմվոլների բերած դժոխային մտքերին տեր լինելու, այսինքն` վերացնելու Հայաստանը. որովհետև Սորոսի ճտերն ու Էրդողանի եթիմները համախմբված վերացնում են Հայաստանը»,- ասաց Մանուկյանը:

Նա հույս հայտնեց, որ մեր ժողովուրդը «սթափության կգա»:

«Շատերն ասում են` հավաքվել էր ժողովուրդը, կարող էիք իշխանափոխությունն անել: Ես մի բան ասեմ` եթե ժողովուրդը նորից չի հավաքվելու, 365 օրից միայն մի օրն է ուզելու իշխանափոխություն, ավելի լավ է, թող չլինի այդ իշխանափոխությունը: Եթե 364 օր չես ուզում, մի օրն ուզում ես, դա իշխանափոխություն չի, այսպահականություն է: Իսկ ես վստահ եմ, որ դա արմատական կերպով է մեր մեջ նստած, որ, այո', արժանապատիվ կերպով պիտի հայոց հողի վրա ապրենք, և Հայաստանը լինելու է, ինչքան էլ այս լրտեսախումբը փորձի ապացուցել, որ Արցախը հանձնելը հաղթություն է, Հայաստանը վերացնելը հաջողություն է: Հասկանում եք` մեզ գժվացրել են գժերը: Բոլորի գրպանում պիտի գժի թուղթ դնես, որովհետև այդ մտքերն առողջ մարդը չի կարող արտաբերել»,- ասաց Մանուկյանը: