Մարդիկ հուզվում են, երբ դասագրքերում iPhone-ի մասին է խոսքը․ դպրոցը պետք է խոսի երեխայի հետ՝ նրան հասկանալի լեզվով՝ սովորեցնելով արժեքներ․ ԿԳՄՍՆ

Դասագրքերի մասին մարդկանց դիտարկումների հիմքում, ըստ ԿԳՄՍ նախարար Ժաննա Անդրեասյանի, ընկած է մի դատողություն, որ դպրոցը չպետք է կապ ունենա մեր իրականության հետ։ Այս մասին նա ասաց լրագրողների հետ հանդիպմանը։

«Մարդիկ հուզվում են, երբ դասագրքերում iPhone-ի մասին է խոսվում, հուզվում են, երբ դասագրքերում ժամանակակակից երաժշտությանն ենք անդրադառնում, մարդիկ ընդհանրապես ամեն ինչից կարծես հուզվում են»,- ասաց Ժաննա Անդրեասյանը։

Նրա դիտարկմամբ, այն ինչ գրված է այսօրվա դասագրքերում պարզապես դպրոցին մոտ է պահում իրականությանը։

«Դպրոցը պետք է մոտ լինի մեր իրական կյանքին։  Չի կարող մեր երեխաների կյանքը լինել մի բանի մասին, դպրոցը լինի տրամագծորեն ուրիշ բանի մասին»,- ասաց ԿԳՄՍ նախարարը՝ վստահեցնելով, որ գրքերում տեղ գտած դասերը հենց այս տրամաբանության հիմքում են։

Նրա գնահատմամբ` դպրոցը գնալով կորցրել է կապը երեխաների հետ և, ըստ նախարարի, դա է պատճառը, որ դպրոցը ծայրահեղ անհետաքրքիր է նրանց համար։ 

«Դպրոցը պետք է խոսի երեխայի հետ՝ երեխային հասկանալի լեզվով ու ձևով։ Օգտագործելով այդ ձևը՝ երեխային սովորեցնելու ենք գիտելիքներ, արժեքներ  ու հմտություններ, որի կարիքը այդքան  ունենք»,- ասաց նա։

Նախարարը հորդորեց զերծ մնալ քննադատություններից ու քննարկումներից և թողնել մասնագետնների դատին, թե որ նյութն է պետք օգտագործել դասագրքերում։