Մյուռոնօրհնեքին իշխանություններին հրավիրելը դիրքորոշումների փոփոխություն չի ենթադրում. Արշակ Սրբազան
Մայր աթոռը Մյուռոնօրհնության և Մայր տաճարի վերաօծման արարողություններին իշխանությանն ուղարկած հրավերներին մասնակցության վերաբերյալ սպառիչ պատասխաններ չի ստացել։ Այս մասին լրագրողների հետ հանդիպմանն ասաց Գերաշնորհ Տեր Արշակ արքեպիսկոպոս Խաչատրյանը։
«Միայն Ազգային ժողովի նախագահի կողմից է սպառիչ պատասխան տրվել, որ չի մասնակցելու»,- ասաց նա։
Մայր տաճարում երկար են մտածել՝ հրավիրե՞լ, թե՞ ոչ իշխանություններին։ Ի վերջո, հաշվի առնելով եկեղեցու և իշխանության ներքին լարվածությունը, որոշել են այնուամենայիվ հրավիրել։
«Ես ցանկացա շեշտել, որ իշխանություններին հրավիրելը որևէ ձևով դիրքորոշումների փոփոխություն չի ենթադրում։ Եկեղեցու ողջ պատմության ընթացքում եկեղեցին աջակից է եղել պետությանը, իշխանություններին։ Երբեմն մենք իշխանություններին տարբերակում ենք պետությունից, այդ սահմանագիծը շատ նուրբ է։ Չափազանց դժվար է իշխանություններին քննադատություն ուղղել՝ առանց մտահոգություն ունենալու, որ պետությանը չես վնասի։ Բայց երբ իրավիճակը հասնում է մի հանգրվանի, երբ այլ տարբերակ չկա, նշանակում է՝ պետք է գնալ այդ ճանապարհով»,- ասաց Տեր Արշակ արքեպիսկոպոս Խաչատրյանը։
Նա վստահեցնում է, որ իր համար շատ պարզ իրականություն է. եթե իշխանությունը ձախողել է գոյաբանական խնդիրների լուծման առաքելությունը, ինքը դառնում է սպառնալիք պետության համար։ Եվ այս ըմբռնումները, ըստ նրա, նոր չէ, որ շարադրվում են։
«Եկեղեցին միշտ պատրաստակամություն ունեցել է աջակցելու իշխանություններին, վկան վերջին 30 տարվա պատմությունն է, որի համար մեզ մեղադրել են իշխանահաճոյության մեջ։ Բայց մեզ առաջնորդող գաղափարը բացարձակապես դա չի եղել, այլ՝ լինել նեցուկ իշխանություններին, որպեսզի լուծենք մեր առջև ծառացած խնդիրները, որոնցից առաջինը հենց Արցախի հարցն էր»,- ասաց Տեր Արշակ արքեպիսկոպոս Խաչատրյանը։
