Կոտայքի մարզում դաբաղի դեպքեր են արձանագրվել

Newspress.am-ի տեղեկություններով Կոտայքի մարզի Աբովյանի տարածաշրջանի գյուղերում խոշոր եղջերավոր կենդանիների շրջանում դաբաղ հիվանդության դեպքեր են արձանագրվել:

Մասնավորապես դաբաղի դեպքեր են արձանագրվել Կապուտան և հարակից համայնքներում, մասնավոր մեծ ու փոքր տնտեսություններում:

Նշենք, որ դաբաղը սուր ընթացող և բացառիկ արագությամբ տարածվող վարակիչ հիվանդություն է: Առանձնապես զգայունան են տավարը, խոզերը, ոչխարները և այծերը: Վարակումն իրականանում է օդակաթիլների կամ շփման միջոցով: Վարակի տարածման աղբյուրը նաև հիվանդ և վիրուսակիր կենդանիներն են, որոնք առատ հոսող թքի, մեզի և կղկղանքի հետ վիրուս են արտազատում` վարակելով շրջապատի առարկաները:

Վարակված կենդանիների մոտ արտահայտվող ընդհանուր կլինիկական նշաններն են` մարմնի բարձր ջերմաստիճանը (մինչև 410C), ախորժակի կորուստը, կաթնատվության նվազումը, կաղությունը, որոճող կենդանիների մոտ առատ թքարտադրությունը և քթային արտահոսքը, մատղաշ կենդանիների մոտ մահացությունը, բարձր հիվանդության աստիճանը, բշտերը բերանի շուրջը և ներսում, վերջույթների և կաթնագեղձի վրա:

Թույլատրվում է օգտագործել դաբաղով հիվանդ կենդանու մսեղիքը, մսամթերքը և կաթը միայն ջերմային մշակման ենթարկելուց հետո:

Նշենք, որ Սննդի անվտանգության պետական ծառայությունը ՀՀ մարզերում «Գյուղատնտեսական կենդանիների պատվաստում» ծրագրի շրջանակներում պետական պատվերով կատարվում են գյուղատնտեսական կենդանիների և թռչունների ախտորոշիչ հետազոտություններ, պատվաստումներ և մշակումներ, մասնավորապես՝ խոշոր եղջերավոր կենդանիների դաբաղ հիվանդության նկատմամբ պատվաստումներ:

Թեև պետականորեն սահմանված պատվաստումներին, այնուամենայնիվ դաբաղը կարողանում է գլուխ բարձրացնել, իսկ թե ինչու, այս հարցի պատասխանը ոչ ոք չունի, անգամ ՍԱՊԾ-ն: