Մինչև ականջները հասնող լայն ժպիտով ու հրճվանքով դոշին սեղմած «հակահայկական քարոզչության» գրքով՝ խայտառակում է ողջ «ռեսպուբլիկան»

Դեռ տարիներ առաջ թուրքական պետության հիմնադիր Քեմալ Աթաթյուրքը գրել է, թե «Կովկասյան պատը պետք է վերացնել», հակառակ դեպքում Թուրքիան պաշտպանվելու հնարավորություն չի ունենա և չի կարող զարգանալ։

Ամիսներ առաջ էլ Թուրքիայի գործող նախագահ Ռեջեբ Թայիփ Էրդողանն իր այս ցանկությունների մասին խոսուն վերնագրով գիրք է հրատարակել՝ «Ավելի արդար աշխարհ հնարավոր է»։

Այս գրքի մեջ զետեղված է նաև նրա այն դիրքորոշումը, որի մասին բազմիցս է հայտարարել։ Այն մոտավորապես կայանում է նրանում, որ Էրդողանը ցանկանում է տեսնել Թուրքիան շատ ուժեղ, որպեսզի Իսրայելը չկարողանա «անել այն, ինչ անում է Պաղեստինի հետ»։

Խոսելով 44-օրյա պատերազմում Թուրքիայի կարևոր դերակատարման մասին՝ Էրդողանը մի առիթով հայտարարել է նաև, թե՝

«Ինչպես մտանք Ղարաբաղ ու Լիբիա, նույն բանը կանենք նրանց հետ։ Պատճառ չկա չանելու։ Միայն պետք է ուժեղ լինենք»։

Ու հիմա, իրեն Հայաստանի ղեկավար հռչակած անձը, ով դեռ երեկ հայտարարում էր, թե իբր իր ամենամեծ թերությունը իր հայրենասիրությունն է, Նյու-Յորքում գտնվող «Թուրքական տուն» կոչվող երկնաքերում, սիրով, խանդավառությամբ, հրճվանքով ու մինչև ականջները հասնող ժպիտով վերցնում է թշնամի երկրի ղեկավարի ցանկությունների գիրքը՝ հավանաբար դրանք վերջնականորեն ի կատար ածելու համար։

Մյուս կողմից էլ, երբ նայում ես, թե ինչպես է նա հաճույքով կրծքին սեղմել Թուրքիայի նախագահի հեղինակած գիրքը, որը, ըստ էության, «հակահայկական քարոզչության» գիրք է, սկսում ես մտածել, թե կոնկրետ ո՞ր երկրի մասին էր խոսում Փաշինյան Նիկոլը, երբ ասում էր, թե ինքը շատ հայրենասեր է․․․

Ուզում ես ասել՝ մի' հանձնվիր Նիկոլ, խայտառակվիր մինչև վերջ, բայց ցավ ես զգում, երբ գիտակցում ես, որ այդ խայտառակվող անձը, ում թշնամին անվանել է խրտվիլակ, ներկայացնում է Հայաստանն ու հայ ժողովրդին ու իր հետ խայտառակում ողջ «ռեսպուբլիկան»․․․

Արմինե Մկրտումյան