«Այսօրվա կառավարությունը, առկա մարդկային ռեսուրսներով, ՀՀ-ում լավագույն տարբերակն է»․ Ալեն Սիմոնյան
Ընդդիմությունը մի հատ սովորություն ունի․ ինքը հարցը տալիս է, ինքը՝ պատասխանում, ինքն էլ սկսում այդ հարցի հետ վիճել։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը՝ անդրադառնալով արդարադատության արդեն նախկին նախարար Գրիգոր Մինասյանի նշանակմանն ու նրա ազատման դիմումին:
Նա հերքեց այն տեսակետը, թե Գրիգոր Մինասյանի նկատմամբ ՔՊ արշավն սկսվեց Ռոբերտ Քոչարյանի գիրքը ձեռքին նկարված Սիրվարդ Գևորգյանին փոխնախարար նշանակելուց հետո։
«Մենք ասել ենք՝ վենդետա չի լինելու։ Այլ հարց է՝ հեղափոխությունից հետո մարդը գնում է ճիշտ ճանապարհով, թե՞ ընկնում իր մանկության երազանքի հետևից՝ ուզում ա մեծանա Սերժ Սարգսյան դառնա, կամ Ռոբերտ Քոչարյան դառնա»,- ասաց նա՝ հավելելով, որ իրեն արդյունքն է հետաքրքիր։
Ալեն Սիմոնյանը նշեց, որ բոլոր այն պաշտոնյաները, ովքեր այսօր նստած են պաշտոնի՝ ՔՊ-ի շնորհիվ են հայտնվել այդ աթոռին․ «Դե կներեք, էլի, 2 տարի հետո այդ պատգամավորները գնալու են դռնեդուռ՝ քվե խնդրեն»,- ասաց նա։
Ալեն Սիմոնյանը շեշտեց, որ իր թիմից դժգոհ չէ։
«Այսօրվա կառավարությունը, առկա մարդկային ռեսուրսներով, ՀՀ-ում ամենալավագույն տարբերակն է»,- ասաց նա։
