Հատուկ ոստիկանության համար․ Աննա Հակոբյանի Lexus-ը՝ մգացված ապակիներով․ Mediahub.am (տեսանյութ)

Հայրենի բարեփոխված ոստիկանությունը՝ իր պետով, տեղակալներով, Պարեկային ծառայությամբ, ծառայության պետով, գումարած՝ շարքային պարեկները, ոչ մի կերպ չեն կարողանում տեսնել կամ նկատել, որ Նիկոլ Փաշինյանի տիկին Աննա Հակոբյանին սպասարկող թանկարժեք Lexus LX500 ամենագնացի առջևի կողային ապակիները մգեցված են։

Այսինքն՝ Փաշինյանի տիկինը երթևեկում է օրենքի խախտմամբ, բայց այդ փաստը մեր ոստիկանները՝ շարքային ծառայողից մինչև Պարեկային ծառայության ղեկավար, փոխնախարար և ՆԳ նախարար, չեն նկատում։ Կամ նկատում, բայց չտեսնելու են տալիս, կամ տեսնում ու չեն նկատում, կամ տեսնում են, նկատում են, բայց ոչ մի կերպ չեն կարողանում դա արձանագրել, որովհետև Աննա Հակոբյանն այս երկրում ամենաարտոնյալ մարդկանցից է, որը կարող է իրեն օրենքից վեր դասել, խախտել օրենքն ու որևէ պատասխանատվության չենթարկվել։ 

Երեկ հերթական անգամ մենք բախվեցինք ոստիկանության տեսողական խնդիրներին, երբ Սահմանադրական դատարանի դիմաց ցուցարարների կողմից իրականացվող ակցիայի ժամանակ վիճաբանություն սկսվեց պատգամավորներ Գառնիկ Դանիելյանի, Արթուր Սարգսյանի ու ՆԳ փոխնախարար Վարդան Վարդանյանի և Պարեկային ծառայության ղեկավար Արթուր Խուդինյանի միջև։ Այդ ընթացքում պատգամավորները նրանց հիշեցրին, որ մի քանի ամիս է՝ ոստիկանությունը իրենց համակիրների մեքենաները տարել են տուգանային հրապարակ ու բաց չեն թողնում։

Փոխնախարար Վարդան Վարդանյանը խոստովանեց, որ 17 մեքենա իսկապես գտնվում է ոստիկանության հատուկ պահպանվող տարածքում քրեական վարույթի շրջանակներում։ Բայց չկարողացավ ուղիղ կերպով խոստովանել, որ դրա մեջ դիտավորություն կա՝ ընդդիմադիրներին ճնշելու նպատակով են այդպես արել։ Ասաց՝ օրենք են խախտել, օրենքի պահանջով են տարել։ 

MediaHub-ը նրան հիշեցրեց, որ նույն կերպ կարող էին Աննա Հակոբյանին սպասարկող Lexus-ը տանել տուգանային հրապարակ, որը իրենց պարեկների աչքի առաջ ամեն օր փողոց է դուրս գալիս առջևի մգեցված ապակիներով։ Բայց ՆԳ նախարարի տեղակալն ասաց, թե ինքը դրանից տեղյակ չէ, չի տեսել, չի կարող որևէ բան ասել։ Հիշեցրինք, որ մենք քանիցս հրապարակել ենք այդ կադրերը, անգամ նախարար Վահե Ղազարյանին ենք ցույց տվել, իրենց լրատվականն էլ քաջատեղյակ է դրանից, կարող են դիմել՝ Նարեկ Սարգսյանը կուղարկի այդ կադրերը, բայց Վարդան Վարդանյանը համառորեն պնդեց, որ իրենք նման բան չեն տեսել, ու ցրեց թեման։