Հաճելի նվերներ արտաքին քաղաքականությունը ձախողողին

ՀՀ կառավարությունն Արտաքին գործերի նախարարությանը հատկացրեց 24 միլիոն 850 հազար դրամ: Գործադիրի նիստում ՀՀ արտաքին գործերի փոխնախարար Շավարշ Քոչարյանը նշել է, որ ԱԳՆ-ի՝ նոր վարչական շենք տեղափոխվելու հետ կապված մի շարք ապրանքների գնման անհրաժեշտություն է առաջացել և գումարը ծախսվելու է այդ նպատակով: Գործադիրը ԱԳՆ-ին հատկացվող միջոցները կտարամադրի կառավարության պահուստային ֆոնդից:

Այսօր արտգործնախարարության և Էդվարդ Նալբանդյանի համար հիշվող օր է, մինչ լայն շրջանակներում քննարկվում է, որ արտաքին քաղաքականության առումով կարևոր հարցերում ձախողում ենք արձանագրում, Հայաստանում իշխանական և մերձիշխանական շրջապատում գովում են Նալբանդյանին, նախարարությանը գումար հատկացնում: Էդվարդ Նալբանդյանն ամբողջապես զրոյացրեց դիվանագիտություն և արտաքին քաղաքականություն հասկացությունները՝ 2013թ-ի սեպտեմբերի 3-ից հետո էլ մեր Արտաքին գործերի նախարարույթունը վերածելով ընդամենը մի կառույցի, որը զբաղվում է ուղևորությունների կազմակերպմամբ ու ընդամենը հայտարարություններ տարածելով:

Այսօր Էդվարդ Նալբանդյանին շնորհվել է նաև Երևանի պետական համալսարանի (ԵՊՀ) պատվավոր պրոֆեսորի կոչում: Համալսարանի ռեկտոր Արամ Սիմոնյանը, այսօր նախարարին հանձնելով պատվավոր պրոֆեսորի դիպլոմը, նշել է, որ գիտական խորհրդի որոշումը պայմանավորված է Նալբանդյանի «հասարակական-քաղաքական բեղուն գործունեությամբ, գիտության բնագավառում ձեռքբերումներով, ԵՊՀ-ի հետ բազմամյա արգասաբեր համագործակցությամբ»։

Հետաքրքիր է, թե ինչ հասարակական, քաղաքական բեղուն գործունեություն է վարել, որ վրիպել է հանրության ուշադրությունից: