Իշխանությունը քաղաքական կամք ունի լսելու բոլոր առաջարկները. Է.Շարմազանով

«Համոզված եմ, որ ունենալու ենք ավելի ժողովրդավարական, պրակտիկ ու զրոյի հասցված ընտրախախտումներով Ընտրական օրենսգիրք: Այս մասին ՀՀԿ ԳՄ նիստից հետո լրագրողների հետ զորւյցում ասաց ՀՀԿ մամուլի խոսնակ Էդուարդ Շարմազանովը:

Նա նշեց, որ ԳՄ նիստում անդրադարձել են Ընտրական օրենսգրքի նախագծին: Շարմազանովի դիտարկմամբ` այս ԸՕ-ը առաջընթաց է ապահովելու:
«Այս նախագիծը հենք է և հիմք, որը մենք ունենք, իսկ հիմնական քննարկումները կշարունակվեն ԱԺ-ում: Բազմաթիվ անգամներ է եղել, որ կառավարությունում ներկայացված օրինագիծը փոփոխության է ենթարկվել հետագայում»,- ասաց Շարմազանովը` հավելելով, որ իշխանությունն ունի քաղաքական կամք՝ լսել բոլոր կողմերին ու քննարկել իրատեսական առաջարկները:

Դիտարկմանը, թե այդ դեպքում ինչու է ԸՕ նախագիծը ուղարկվել Վենետիկի հանձնաժողով, առանց քաղաքացիական հասարակության կամ ընդդիմադիր գործիչների կարծիքներն իմանալու, Շարմազանովը պատասխանեց. «Իսկ ՀՀ նորագույն պատմության մեջ ազնիվ ընդդիմադիրները ե՞րբ են հիշում, որ մասնագիտական նախնական փաստաթուղթը նախ քննարկվի հանրության ներկայացուցիչների հետ: Քննարկումները նոր պետք է սկսվեն, դրա համար ուղարկվելու է շուտով Ազգային ժողով, քննարկումները ԱԺ-ում ցույց կտան, թե ինչպիսի Ընտրական օրենսգիրք կներկայացվի հանրությանը»: