Այդպես չի լինում, որ հինգշաբթի օրը ԱԱԾ-ն ներխուժի դպրոց, 3 օր հետո ասեն՝ դրսից օտար տնօրեն ենք բերում․ Ջոն Կիրակոսյանի անվան դպրոցի ուսուցչուհի
Ջոն Կիրակոսյանի անվան դպրոցի ռուսաց լեզվի ուսուցչուհի Իրինա Ոսկանյանը պատահական չի համարում, որ օրերս դպրոցում ԱԱԾ կողմից իրականացված օպերացիան, որին հաջորդեց նոր տնօրեն նշանակելու մասին լուրը։
Լրագրողների հետ զրույցում նա նշեց, որ այս երկու իրադարձությունների միջև տրամաբանական կապ է տեսնում։
«Այդպես չի լինում, որ հինգշաբթի օրը ԱԱԾ աշխատակիցները ներխուժեն դպրոց, իսկ 3 օր հետո ասեն, որ տնօրենի ժամանակավոր պաշտոնակատար են բերում։ Չէինք հասցրել առաջին դեպքից հետո ուշքի գալ, ընդամենը 3 օր անց՝ երկրորդ ցնցումը։ Շաբաթ ուշ երեկոյան ասացին, որ տնօրենի նոր Ժ/Պ են բերում»,- ասաց Իրինա Ոսկանյանը։
Ուսուցչուհու գնահատմամբ` գործող տնօրենը տարիների վաստակ ունի։ Նա նկատեց, որ առաջին դպրոցն են եղել, որ ներառական կրթություն են իրականացրել։ Ուսուցիչներն օտար թեկնածու բերելու և ժամանակավոր պաշտոնակատար նշանակելու մասին Ֆեյսբուքից են իմացել։
«Ինչո՞ւ են փորձում տնօրենի ժամանակավոր պաշտոնակատար նշանակել դրսից՝ դպրոցին անծանոթ մարդու։ Մեր 70 հոգուց բաղկացած կոլեկտիվում ուրեմն մեկը չկա՞։ Ցավը նրանում է, որ մենք ունենք մեր թեկնածուն, այնպես չէ, որ մենք չունենք ու կարիքն ունենք օտարի»,- ասաց նա։
