Եթե բերքն առատ է, գյուղացիներին ավելի առատ են խաբում

Եթե գյուղվարկերի վճարման ժամկետը վարկառուներն ուշացնեն, ապա տույժ ու տուգանքներ են նաև վճարելու, եթե լույսի, գազի վարձերը չվճարեն ապա անջատումներն անխուսափելի են: Պարզվում է, որ մարդիկ պետք է ամեն օր հաց ուտեն, գոնե հանապազօրյա: Նաև պետք է հագուստ հագնեն, ցանկալի է հնոտիք չլինի, կամ էլ մեր նախապապի և նախատատի հագուստներ չկրեն:

Պարզվում է անգամ հաց ուտելը, կամ ցնցոտիները քիչ թե պատշաճ հագուստով փոխարինելու համար, զարմանք, փող է պետք: Հայրենի խաղողագործներն այս տարի հայտնվել են լույս ու գազ չունենալու, մեր ադամահոր նորաձև հագուստները տևական ժամանակ անց փորձելու խնդրի առջև: Եվ այդ ամենի մեղավորը խաղողի առատ բերքն էր:

2015թ-ի խաղողագործների փորձությունները չսահմանափակվեցին միայն խաղողի առատ բերքով, թեև գյուղնախարարությունը փորձում է շտկել իրավիճակը, համոզում է վերամշակողներին` ձեզ ցածր տոկոսադրույքով վարկեր ենք տվել, ի վերջո աղքատ չեք, խաղողագործներին վճարեք, վերամշակողները երևի թե այնքան էլ չեն համոզվում: Քանի որ դրա համար որևէ տույժ-տուգանք չկա, միայն գործարարի համբավն է, որի համար էլ չեն անհանգստանում, նախարարությունն էլ լծակներ չունի և առանձնապես ցանկություն ևս հարցը ավելի խիստ դնելու և լուծելու համար: Յուրաքանչյուր խաղողի վերամշակման գործարան պատկանում է կամ որևէ օլիգարխի, կամ որևէ օլիգարխի ազգականի, կամ էլ օլիգարխի արտը գտնվում է գործարանի սեփականատիրոջ արտի կողքին:

Այսօր էլ դեռևս հայտնի չէ, թե ինչքան է նախորդ տարվա մթերումների համար վճարվել, ինչքան` ոչ: Գյուղնախարարությունից թեև հայտնում են 90 տոկոս, սակայն 2015թ-ի դեկտեմբերի ամփոփիչ ասուլիսի ժամանակ ևս գյուղնախարար Սերգո Կարապետյանը ևս ասաց մոտ 90 տոկոս, եթե դեկտեմբերին մոտ 90 տոկոս լիներ վճարումները, այս տարի ևս վճարումներ կատարվել են, նախարարը կրկին հարցը չէր բարձրացնի, նշանակում է ցածր են վճարումները: Սերգո Կարապետյանը, մտածելով, որ այս տարի, իրոք գյուղացիները կարող են խաղող կամ չմշակել, կամ խաղողի այգիները քանդել և արդյունքում հայրենի գինեգործությունն ու կոնյակագործությունը վերամշակողների անպատասխանատվության և խաբեբայության համար գյուղոլորտը թանկ վճարի, արդեն որի պատասխանատուն Սերգո Կարապետյանն է:

Իսկ վերամշակողները ինչպես կարողացան խաբեցին այս տարի խաղողագործներին կամ չէին մթերում, կամ խոստանում` չէին մթերում, կամ 150 դրամի փոխարեն 40 դրամով էին մթերում, կամ խոստացան թեկուզ 40-50 դրամով, վճարել դեկտեմբերին, սակայն առ այսօր չեն վճարել, կամ վճարելուց առաջարկում են ավելի քիչ գումար:

Կարճ ասած, ինչպես կարողացան խաբեցին ու բլեֆ արեցին առատ խաղողի բերքի պայմաններում: Կարծես թե առատ բերքը խաղողագործների քթով եկավ, էլ ինչ հպարտանալու բան է, առատ բերք ունենք, եթե դրանից որևէ օգուտ չկա, առատ բերքի պայմաններում մարդկանց ավելի առատ են խաբում:

Իսկ, որ մեծամասամբ խաղողագործները այս տարի խաղողի վազերը հողով չեն ծածկել, կարելի է համոզվել խաղողի մշակությամբ զբաղվող համայնքներում պարզապես հարցումներ անելով:

Այնպես, որ եթե խաղողի դիմաց չվճարեն խելամիտ ժամկետներում, այս տարի Սերգո Կարապետյանը թանկ է վճարելու դրա համար. Արդեն առատ բերքով որևէ մեկին ոչ կզարմացնի, ոչ էլ գյուղոլորտի ցուցանիշներ կունենա: Գյուղատնտեսությանը և Սերգո Կարապետյանին կոտրած տաշտակի առջև են կանգնելու: