ՀՀ-ԵՄ վիզաների ազատականացման վերաբերյալ մարտահրավերներն ու խնդիրներն են քննարկել

ՀՀ ՆԳՆ միգրացիայի և քաղաքացիության ծառայության պետ Արմեն Ղազարյանն այսօր պատասխանել է հասարակական կազմակերպությունների ներկայացուցիչների հարցերին` ՀՀ-ԵՄ վիզաների ազատականացման երկխոսության վերաբերյալ: Հայտնում են Միգրացիայի և քաղաքացիության ծառայությունից։ 
 

Ծառայության պետը ներկայացրել է արդեն կատարված աշխատանքները, որոնք մեկնարկել էինք երկխոսությունից առաջ և համահունչ են այն բարեփոխումների ծրագրին, որոնք, այլ պետությունների օրինակով, օրակարգային են վիզաների ազատականացման համատեքստում:
 

Ոլորտով հետաքրքրված կազմակերպությունների ներկայացուցիչների հետ քննարկվել են`
 

●գործընթացի համար պատասխանատու գերատեսչությունների միջև գործառույթների բաշխմանը,

●պատասխանատվության շրջանակին,

●կանխատեսելի մարտահրավերներին,

●հնարավոր խնդիրներին վերաբերող հարցեր:
 

Արմեն Ղազարյանը ներկայացրել է կենսաչափական անձնագրերի նոր ենթակառուցվածքի ներդրման ծրագիրը, բացատրել, թե ինչ նշանակություն կունենա ծրագիրը ենթակառուցվածքի մոդեռնիզացման, տվյալների պաշտպանության բարձրացման, ինչպես նաև սահմանների կառավարման արդյունավետության բարձրացման իմաստով:
 

Ղազարյանն անդրադարձել է նաև միգրացիայի կառավարման ոլորտի հարցերին, ընդգծել, որ գործողությունների ծրագրով սահմանվող դրույթներից յուրաքանչյուրը ենթակա է առանձին և լիարժեք կատարման։