Ավագանու ընդդիմադիր անդամները փողի դիմաց պատրաստ են հաստատել Երևանի գլխավոր հատակագիծը
Երևանի ավագանին դեռ մեկ ամիս առաջ նիստում քննարկել և ընդունել է «Երևան քաղաքի գլխավոր հատակագիծը հաստատելու մասին» որոշման նախագիծը։
Չենք քննարկում այն, որ 8 ամիս մշակված ու լրամշակված նախագիծը, առանց հանրային լսումների, հաստատվել է համապատասխան հանձնաժողովի կողմից ու ներկայացվել հաստատման։ Ավելի կոնկրետ` մայիսին եղել է ոչ մեծ քննարկում, որին մասնակցել է 11 անձ։ Առանց հարցուպատասխանի, նախագիծն անցել է հաջորդ փուլ։
Համեմատելու համար նշենք, որ, օրինակ, 2005 թվականին, Երևանի գլխավոր հատակագիծն անցել է ռազմավարական էկոլոգիական գնահատման մի քանի ամիս տևողությամբ ինտենսիվ գործընթաց, որի շրջանակում իրականացվել է 7 հանրային ու մասնագիտական լսում/քննարկում՝ մոտ 270 մասնագետների, հասարակական գործիչների և շահագրգիռ քաղաքացիների մասնակցությամբ։
Սա իմիջիայլոց․․․
Նորից անդրադառնանք 2024-ի նախագծին, որը ոչ միայն հանրային լսումների և քննարկման չի արժանացել, այլև ս․թ․ սեպտեմբերի 10-ին հաստատվել է առանց «Հանրային ձայն» խմբակցության մասնակցության։
NEWSPRESS.am-ին հասած տեղեկություններով` խմբակցությունը կլորիկ գումար է ուզել՝ կողմ քվեարկելու համար։ Քաղաքապետարանի մեր աղբյուրի փոխանցմամբ` մյուս խմբակցությունները ևս գումար են պահանջել, սակայն, ի տարբերություն նրանց, ըստ նույն աղբյուրի, «Հանրային ձայն»-ը պահանջել է մոտ 3 անգամ ավելին․․․
Գումարից բացի, խմբակցությունը պահանջել է նաև ազատ արձակել կուսակցության նախագահ Արտակ Գալստյանի որդուն և շինթույլտվություն տալ իրենց։
Ու քանի որ խմբակցությունը պահանջել է մի բան, որի համար Երևանի քաղաքապետ Տիգրան Ավինյանի «թափը չէր հերիքի», ուստի նա, մեր տեղեկություններով, գործարքի է գնացել մյուս խմբակցությունների հետ։
Այստեղ էականն արդեն այն չէ, թե որքան գումարի դիմաց են ավագանու անդամները հաստատել գլխավոր հատակագիծը, այլ այն, որ, ըստ էության, գործող իշխանությունն ինչ ուզում, ոնց ուզում՝ «սղցնում է» ու ընդդիմության անվան տակ քաղաքապետարան մտած գործիչներն էլ, կարելի է ասել, փողի դիմաց սատարում են իշխանություններին։
Չի բացառվում, որ հատակագիծը հաստատվելու է չզեկուցվող հարցերի շարքում, իսկ դրանից հետո հայտնի չէ՝ որևէ մեկը կենթարկվի՞ պատասխանատվության՝ սխալ հատակագիծը հաստատելու համար, թե՞ ոչ։
Բայց այստեղ կա մեկ ուրիշ բայց ևս․․․․
5 տարվա համար մշակված հատակագծին կողմ քվեարկելու դիմաց չստանալով իր պահանջած գումարն ու սպասելիքները, քաղաքապետարանի մեր աղբյուրի համաձայն, «Հանրային ձայն» խմբակցության ղեկավար Վահան Ավագյանն իր խմբակցության անդամներին հորդորել է բոյկոտել քվեարկությունը, սակայն նրան մերժել են։
Մեր աղբյուրի փոխանցմամբ` շատ նախագծեր, որոնց որոշել է բոյկոտել կամ դեմ քվեարկել «Հանրային ձայն»-ը, Վահան Ավագյանը մասնակցել և կողմ է քվեարկել։ Այդպիսի նախագծերից է, օրինակ, կարմիր գծերի թանկացման նախագիծը։
NEWSPRESS.am-ին մոտ կանգնած քաղաքապետարանի մեր աղբյուրները նշել են, որ այստեղից էլ սկսել են տարաձայնությունները Վահան Ավագյանի ու կուսակցականների միջև։
Հավանաբար, հենց այդ տարաձայնությունների մասին է գրել Վահան Ավագյանն իր գրառման մեջ, որով, դեպքից մեկ ամիս անց, հայտարարել էր, թե՝ ստիպված է լքել կուսակցությունը, բայց կմնա խմբակցությունում։
Ասում են, ընդհանուր առմամբ, Վահան Ավագյանը դեմ չէ պարել քաղաքապետի դուդուկի տակ, միայն թե լծակներ ունենա ու օդից փող բռնի։
Չի բացառվում նաև, որ նա Ավինյանի հետ գործարքի է գնացել նաև հատակագծի հարցում ու Х գումարով համաձայնել այնուամենայնիվ անել այն, ինչ կասի Ավինյանը։
Հավանաբար, Վահան Ավագյանը լսել է Նիկոլ Փաշինյանի թևավոր հորդորն ու որոշել առաջնորդվել՝ «որտեղ հաց՝ այնտեղ կաց» սկզբունքով՝ դառնալով քաղաքապետի գրպանային ընդդիմությունը։
