Մեկ մանդատով Աժ-ում ի՞նչ կարող է անել հույնը

Ընտրական նոր օրենսգրքով Ազգային ժողովում ՀՀ ազգային փոքրամասնությունները կունենան 4 մանդատ: 

Նկատենք, որ Հայաստանում ապրում են չորսից ավելի ազգերի ներկայացուցիչներ, ու դեռևս պարզ չէ, թե նրանցից ում և ինչ սկզբունքով կտան նախապատվությունը:

Եթե հետևում ենք թվային տվյալներին, ապա առաջին 5 տեղը զբաղեցնում են հաջորդաբար եզդիները, ռուսները, ասորիները, քրդերը և ուկրաինացիները: Սակայն չի բացառվում, որ ԱԺ մտնելու նախապատվությունն ազգային փոքրամասնություններին տրվի այլ չափորոշիչներով:

Newspress.am-ի հետ զրույցում ազգագրգետ Հրանուշ Խառատյանը նկատեց, որ ստորագրվել է ՀՀ ազգային փոքրամասնությունների լեզուների պաշտպանության խարտիա, ըստ որի՝ 5 ազգերի ռուսների, քրդերի, եզդիների, ասորիների և հույների լեզուն պաշտպանության տակ է:
Նրա կարծիքով՝ հենց այս սկզբունքով էլ գուցե կընտրվի ազգերի ներկայացուցչությունը ԱԺ-ում: Նա չի բացառում, որ եզդիներն ու քրդերը կընդգրկվեն մի խմբում:

Այնուամենայնիվ, Հրանուշ Խառատյանը չի կարծում, որ Հայաստանում գտնվող 2 տոկոս ազգային փոքրամասնությունները ԱԺ-ում 4 մանդատով պետք է ներկայանան:

«Կարծում եմ, որ լուծում կարող էր այլ կերպ լինել: Այսինքն, ազգային փոքրամասնությունների խնդիրները ներկայացնողները թող բոլորը միասին ընտրվեին, ոչ թե միայն թիրախավորված խմբեր: Օրինակ, եթե հույներն ընտրվեն՝ Հայաստանում 1000 հույն չկա ու նրանց խնդիրները լրիվ պարզ է: Իհարկե, սիրուն կլինի մի հատ հույն նստած լինի, բայց ինչ խնդիր պետք է ներկայացնի»,-ասաց Խառատյանը: