Ինչպես է ինքնասպան եղած զինծառայողը կրակել իր գլխին, հետո կրծքավանդակին՝ փորձագետներն էլ չեն հասկանում. Իրավապաշտպան

«Խաղաղ պայմաններում զինվորների մահվան դեպքերը նախորդ տարիների հետ համեմատած շատ մեծ է։ Այս մասին ասուլիսի ժամանակ հայտարարեց Հելսինկյան քաղաքացիական նախաձեռնության Վանաձորի գրասենյակի իրավապաշտպան Նազելի Մովսիսյանը։

«Մեր ուսումնասիրություններով 2024 թվականին ԶՈւ-երում արձանագրվել է 39 զինծառայողի մահվան դեպք, որից 4-ն է միայն եղել հրադադարի ռեժիմի խախտման հետևանքով»,- ասաց նա։

Նազելի Մովսիսյանը հիշեցրեց, որ նախորդ տարի արձանագրվել էր ոչ մարտական պայմաններում 64 մահվան դեպք և 19 դեպք՝ հրադադարի ռեժիմի հետևանքով։

«Համեմատելով վերջին 10-12 տարվա դինամիկան՝ արձանագրում ենք, որ ԶՈւ-երում ոչ մարտական պայմաններում մահացության դեպքերը միջինում կազմում են ավելի քան 80%։

Իրավապաշտպանը նշեց, որ պաշտոնական և իրենց հրապարակած վիճակագրության տարբերության պատճառն այն է,որ 2017 թվականից հետո զինծառայողների մահվան զինվորական ծառայությունների հետ կապված և չկապված դեպքերը տարանջատվել են։

«Խաղաղության երկխոսություն» ՀԿ նախագահ և իրավապաշտպան Զառա Հովհաննիսյանն էլ նշեց. «Ինքնասպանությունների մասով մենք մեր պրակտիկայում ունեցել ենք այնպիսի դեպքեր, երբ կյանքի հետ բազմաթիվ հրազենային վիրավորումներ ունեցողի դեպքը, այդ թվում՝ կրծքավանդակին  և գլխին, որակվել են որպես ինքնասպանություն։ Թե ինչպես է մարդը կրակել իր գլխին, հետո կրծքավանդակին՝ անհասկանալի է, նույնիսկ փորձագետները չեն կարողանում հասկանալ, բայց միևնույնն է՝ որակվում է որպես ինքնասպանություն»։