Հույս չունեմ, չէ, բայց չեմ կարա առանց պայքարելու նստեմ․ ի՞նչ է, հայ ազգը որոշել է մեռնե՞լ, կոտորվե՞լ․ Լևոն Հայրյան
Ի՞նչ է նշանակում՝ հույս ունե՞նք․ եթե հույս չունենք՝ պետք է գնանք կոտորվե՞նք։ Լրագրողի հարցին այսպես արձագանքեց «Հանուն Հադրութի» ՀԿ նախագահ Լևոն Հայրյանը, երբ լրագրողը հետաքրքրվեց, թե՝ այդքան նամակներ են հանձնում տարբեր կառույցների և ոչ մի դրական արձագանք մինչ օրս չեն ստացել, ի՞նչ հույսեր ունեն։
«Հույս չունեմ, չէ, բայց չեմ կարա առանց պայքարելու նստեմ»,- ասաց Լևոն Հայրյանը, ով մի խումբ արցախցիների հետ եկել էր ՀՀ ԱԳՆ շենքի մոտ՝ մասնակցելու բողոքի ակցիային։
Օգտվելով ընձեռված հնարավորությունից` նա լրատվամիջոցների տեսախցիկների առաջ ցանկացավ դիմել հայ ազգին։
«Ի՞նչ է, հայ ազգը որոշել է մեռնե՞լ, կոտորվե՞լ։ Ո՞վ է տարբերություն դրել, որ էս մի հայը ղարաբաղցի է՝ Ղարաբաղի առանձին հարց կա։ Կարո՞ղ ա Սարդարապատի ճակատամարտի ժամանակ հայությունը կիսված էր 15 տեղ, թե՝ մեկը շուռնուխցի է, մյուսը ղարաբաղցի է, մյուսը եսիմ որտեղից»,- ասաց նա։
Նա ընդգծեց, որ հստակ ծրագրավորած վերացնում են Հայաստանի պետականությունը։
«Ընկել են երկու թափթփուկի, թեթևսոլիկի հետևից, որ Արցախի հարցը մեր երկիրը կործանման է տանում, պետք է Արցախը մոռանա՞նք»,- ասաց նա։
