Սիմոնյանը «բումերանգը» ուղղում է Նիկոլ Փաշինյանի կողմը․ վերլուծաբան

ԱԺ նախագահ Ալեն Սիմոնյանին լրագրողները հարց են տալիս իր ցածր վարկանիշի մասին, որ արձանագրել է միջազգային կազմակեչպության սոցհարցումը: Գրել է վերլուծաբան Հակոբ Բադալյանն ու հավելել․

«Իսկ Սիմոնյանը փաստորեն «բումերանգը» ուղղում է Նիկոլ Փաշինյանի կողմ, հայտարարելով, որ ինքը չունի առանձին վարկանիշ, իրենց վարկանիշը մեկ է՝ քաղաքական թիմ, վարչապետ Նիկոլ Փաշինյան: Ասել կուզի՝ եթե իմ վարկանիշը ցածր է, ուրեմն՝ ցածր է նաեւ Նիկոլ Փաշինյանի վարկանիշը:

Ինչու՞ է նա «բումերանգը» պտտում Փաշինյանի կողմ: Որովհհետև համոզված է, որ Փաշինյա՞նն է այն արձակողը, թե՞ ունի տեղեկություն կամ համոզված է, որ Փաշինյանը մտադիր է իրեն «հրել» բարձունքից, որի վրա կանգնելու տեղը քչանում է:

Արդյո՞ք դրանով է պայմանավորված և այն հայտարարությունը, որ Արցախի հանդեպ ադրբեջանական ագրեսիայի մասով անում է Ալեն Սիմոնյանը, արդարացնելով Արցախի հանդեպ ադրբեջանական ագրեսիան «միջազգային լեգիտիմությամբ»:

Ինչ, ինչ, բայց Սիմոնյանը լավ գիտե, որ Հայաստանում իշխանությունը այլեւս «Աստծուց»՝ այսինքն ժողովրդից չէ, այլ դրսից, այսինքն արտաքին կոնյուկտուրայից, հետեւաբար պետք է առավելագույնս բավարարել այդ կոնյուկտուրայի պահանջներին: Իսկ այստեղ, Սիմոնյանը թերեւս բավականին լուրջ ահազանգ դիտարկեց Ժնևում Ադրբեջանի ԱԺ նախագահի հետ հանդիպման չեղարկումը:

Միևնույն ժամանակ, ԱԺ նախագահի ակնարկը հերթական անգամ հուշում է, որ իշխանության ներսում «արշալույսները խաղաղ» չեն, բայց ամենեւին ոչ սովորական «ոչ խաղաղությամբ»:

Իրադարձությունների արագությունը՝ թե ներքին, թե առավել եւս արտաքին, Հայաստանում 2018 թվականից հետո կառավարող ուժին բերել է մի կետի, երբ ընդամենը 6-7 տարի անց առաջացել է «զոհաբերության» անհրաժեշտություն: Ընդ որում, ժամանակի ընթացքում այդ անհրաժեշտությունն աճելու է, եւ դա պատկերացնում, հասկանում, կամ առնվազն զգում են բոլորը»: