Այսօր որոշվում է հարցը, թե ում խնամքին է հանձնվում Վրաստանը․ վերլուծաբան

Վրաստանում այսօր չի որոշվում հարցը՝ ԵՄ անդամությու՞ն, թե՞ ոչ: Այս մասին գրել է վերլուծաբան Հակոբ Բադալյանը։

«Այսօր որոշվում է հարցը, ըստ էության՝ Վրաստանը Կովկասում Թուրքիայի եւ Ադրբեջանի՞ խնամքին է հանձնվում, թե՞ կառուցվում է Ռուսաստան-Վրաստան-Հայաստան-Իրան-Պարսից ծոց զուգահեռը՝ Ռուսաստան-Ադրբեջան-Իրան-Պարսից ծոց զուգահեռի կողքին:

Խորքային, ռազմավարական իմաստով Վրաստանում այսօր վճռվում է այդ հարցը: Այսօր ասածն էլ իհարկե պայմանական է, քանի որ գլվարո ինտրիգը այն է, թե կլինե՞ն արդյոք հետընտրական զարգացումներ, թե՞ ոչ:

Ինչպես արտահայտվել եմ, Կովկասի որեւէ երկիր չունի ԵՄ «առանձին» անդամ դառնալու իրատեսական հեռանկար: 

Ավելին, անդամության տեսանկյունից ԵՄ-ին ամբողջ Կովկասը փաթեթով էլ հետաքրքիր չէ, առնվազն քանի դեռ ԵՄ անդամ չի լինի Թուրքիան:

Իսկ Թուրքիան չի լինի, քանի դեռ ԵՄ-ում որեւէ բան կորոշի Ֆրանսիան, նվազագույնը: Եթե իհարկե Ֆրանսիան ինքնիշխան խաղացող է, եւ կամ՝ Ֆրանսիայում կա այդ երկրի շահ հետապնդող «խորքային պետություն»:

Ի դեպ, այդ համատեքստում, տրամաբանությունը հուշում է, որ Ֆրանսիայի շահից չի բխում ռուս-վրացական հակամարտություն կամ պատերազմ: 2008 թվականին Սարկոզիի դերակատարումը ամենեւին պատահական չէ: Ֆրանսիան փորձեց միջամտել ու թույլ չտալ, որ այդ պատերազմը անցնի անդառնալիության մի այնպիսի կետլ որը պարզապես տասնամյակներով կբացառեր ռուս-վրացական որեւէ կոմունիկացիա»,-գրել է վերլուծաբանը։