Նպատակը դատարան տանել-բերելն է. «Հրապարակ»

«Հրապարակ» թերթը գրում է.

«Դատախազությունը բողոքարկել է Վլադիմիր Գասպարյանի, Լևոն  Երանոսյանի և մյուսների դատավճիռը՝ մեր հարցին ի պատասխան հայտնեցին ՀՀ դատախազությունից: Դատավճիռը բողոքարկել են նաեւ Լևոն Երանոսյանը և Վլադիմիր Գասպարյանը։ 

Հիշեցնենք, որ Հակակոռուպցիոն դատարանը` դատավոր Վարդգես Սարգսյանի նախագահությամբ, հուլիսի 9-ին հրապարակեց այս գործով դատավճիռը` նրանց մեղավոր ճանաչեց պաշտոնեական լիազորությունների չարաշահման համար, սակայն ազատեց պատժի կրումից, քանի որ մի մասով նրանց վրա համաներում էր տարածվում, մյուս մասով վաղեմության ժամկետն էր անցել։ Վլադիմիր Գասպարյանի փաստաբանները վերաքննիչ բողոք էին ներկայացրել՝ պահանջելով արդարացման դատավճիռ։ 

Լեւոն Երանոսյանը «Հրապարակ»-ին ասաց, որ դատախազությունը բողոքարկել է, ինքն էլ է որոշել բողոքարկել դատավճիռը։ Հիշեցնենք, որ Վլադիմիր Գասպարյանին մեղադրանք էր առաջադրվել այն բանի համար, որ նա երեք զինծառայողներին թույլ էր տվել զորամաս չհաճախել, եւ արդյունքում, ըստ մեղադրանքի, «վատնման եղանակով պետական միջոցներից հափշտակվել է առանձնապես խոշոր չափի գումար»: Բացի այդ, ոստիկանության հաշվեկշռում գտնվող 15 եւ 10 մլն դրամ արժողությամբ անշարժ գույքը «սեփականության իրավունքով ապօրինի հատկացրել է բնակարանային պայմանների բարելավման կարիք չունեցող ՀՀ ոստիկանության ծառայողներին»: 

Իսկ Լեւոն Երանոսյանին մեղադրանք էր առաջադրվել այն բանի համար, որ նա, ունենալով ոստիկանության զորքերի անմիջական ղեկավարումն իրականացնելու լիազորություն, օգտագործելով պաշտոնեական դիրքը, այլ անձի հետ հանցակցությամբ 2015-2018 թթ․ ընթացքում կատարել է իրեն վստահված՝ ուրիշի առանձնապես խոշոր չափերով գույքի վատնում, ինչպես նաեւ` պաշտոնեական կեղծիք: Վարդան Թունյանին մեղադրանք էր առաջադրվել այն բանի համար, որ նա դրդել է Լեւոն Երանոսյանին` ՀՀ ոստիկանության զորքերի դասակի հրամանատար Վահրամ Ղազարյանին զորամասում աշխատանքի ներկայանալու պարտականությունից ազատել, «պաշտոնեական դիրքն օգտագործել է ծառայության շահերին հակառակ, ինչի արդյունքում առաջացել են ծանր հետեւանքներ»: Բացի այդ, 2014-2018 թվականների ընթացքում կատարել է իրեն վստահված՝ ուրիշի խոշոր չափերով գույքի յուրացում: Գուրգեն Գրիգորյանին մեղադրանք է առաջադրվել այն բանի համար, որ նա օժանդակել է Լեւոն Երանոսյանին` աշխատանքի ներկայանալու պարտականությունից ազատելով ոստիկանության զորքերի դասակի հրամանատար Վահրամ Ղազարյանին:

Այս ամպագոռգոռ բառերի հետևում  իրականում ձևական ու ծիծաղելի մեղադրանքներ էին առաջադրվել, և դատարանն ավելի լուրջ պատիժ ուղղակի չէր կարող սահմանել: Այնպես որ, դատախազությունը եթե դժգոհ է, ապա պետք է ինքն իրենից դժգոհի, որ կարողացել է այս «հին գայլերին» նման ծիծաղաշարժ մեղադրանքներ միայն առաջադրել:

Մանրամասները` թերթի այսօրվա համարում