Վահագն Խաչատուրյանն աշխատանքային այցով մեկնել է Շվեյցարիա

Հանրապետության նախագահ Վահագն Խաչատուրյանը նոյեմբերի 13-ից 15-ը աշխատանքային այցով մեկնել է Շվեյցարիայի Համադաշնություն:

Այցի շրջանակներում նախագահը Ժնևում կմասնակցի «Կրան Մոնտանա» (CRANS MONTANA FORUM) ֆորումի բացման արարողությանը և հանդես կգա ելույթով:

Կռան Մոնտանա ֆորումը շվեյցարական միջազգային ոչ կառավարական կազմակերպություն է, որը հիմնադրվել է 1986թ. Ժան-Պասկալ Դելամուրազի (Շվեյցարիայի Համադաշնության 1989 և 1996թթ. նախագաh, պաշտպանության և էկոնոմիկայի նախկին նախարար), Ժան-Պոլ Կարտերոնի և Լիխտենշտեյնի արքայազնի կողմից:

Ֆորումի նպատակն է նպաստել տարբեր երկրների կազմակերպությունների, կառավարությունների և քաղաքական գործիչների միջև ուղիղ կապի հաստատմանը, ինչպես նաև ապահովել կայունության, արդարության և անվտանգության բարձր մակարդակ: Այն կարևորում է հատկապես միջազգային երկխոսության և համագործակցության զարգացումը:

Ընթացիկ տարվա բացառիկ նստաշրջանը նվիրված է «Անվտանգություն և միջազգային հարաբերություններ, տնտեսական զարգացում, գործարարություն և ներդրումներ» թեմային:

Աշխատանքային այցի շրջանակներում նախատեսվում են նաև նախագահի հանդիպումներն Առևտրի համաշխարհային կազմակերպության գլխավոր տնօրեն Նգոզի Օկոնջո-Իվեալայի, Կարմիր խաչի միջազգային կազմակերպության նախագահ Միրյանա Սպոլյարիչ Էգերի, ՄԱԿ-ի Մարդու իրավունքների բարձր հանձնակատար Վոլկեր Տյուրկի և բարձրաստիճան այլ գործընկերների հետ: