ՔՊ-ական երեսփոխանները բյուջեի քննարկումը վերածել էին «հզոր վարչապետին» քծնելու արարողության․ «Հրապարակ»

«Հրապարակ» թերթը գրում է.

«ՔՊ-ական երեսփոխանները երեկ բյուջեի քննարկումը վերածել էին «հզոր վարչապետին» քծնելու և նախկին թալանչիներին քննադատելու արդեն ձանձրալի դարձած արարողության. ով չէր ալարում, մոտենում էր ամբիոնին և, բռնանալով մայրենիի վրա, քծնում էր Նիկոլ Փաշինյանին։ Նրանց թվում էր սյունեցի պատգամավոր Կարեն Համբարձումյանը, որը նախկին ԲՀԿ-ական է, բայց իշխանափոխությունից հետո արագ ճամբարափոխ եղավ:

Երեկ նա բյուջեին նվիրված իր ելույթում ասաց. «Աստված ոչ անի, եթե պատերազմ սկսվի, ամենայն ազնվությամբ, ես իմ ընտանիքը պետք է վերցնեմ, գնամ այնտեղ, որովհետև միակ անվտանգ տեղը հենակետն է: Այդպիսի հզոր հենակետեր են կառուցվում այսօր: Տարբերությունն ակնհայտ է»։ Պատգամավորն այնքան ելույթ չէր ունեցել ամբիոնից, որ ակնհայտ դիսկոմֆորտի մեջ էր և մի կերպ էր բառերն իրար կապակցում, ինչը «մե խինդ, մե ուրախություն» էր առաջացրել պատգամավորական շարքերում և կառավարական օթյակում, անգամ Նիկոլ Փաշինյանն էր քթի տակ քմծիծաղում։

Համբարձումյանի ելույթից հետո մենք հարցրինք՝ փաստորեն, այնքան անվտանգ եք կահավորում մեր հենակետերը, որ անգամ ադրբեջանցիներին եք գայթակղել` եկել են, երկու տարուց ավելի մնացել Ջերմուկի, Սև լճի դիրքերում: Պատգամավորը ոլորեց աչքերն ու հորդորեց հարցերը գրավոր ուղարկել իրեն: Ինչո՞ւ գրավոր, բանավոր խոսքի հետ խնդի՞ր ունեք։ «Ինչպես տեսաք՝ չունեմ»,- իր ելույթից գոհ՝ հայտարարեց ՔՊ-ականը»։

Մանրամասները թերթի այսօրվա համարում: