Սիրելի՛ քաղաքացիներ, շնորհավորում եմ, ունեք ամենաթանկ վարձատրվող մշակույթի գործիչ-դաշնակահարը․ Քրիստինե Վարդանյան
«Էս ամբիոնից քիչ առաջ խոսում էր մարդ, ով դատարանի որոշմամբ պետք է զրպարտության մեղադրանքով ներողություն խնդրի։ Ուղղակի պետք է հիշեցնեմ, որ նման ամեն մի ելույթից հետո մի քանի հայցեր են դատարաններում ձեր դեմ հայտնվում»։ ԱԺ նիստում ՔՊ խմբակցության քարտուղար Արթուր Հովհաննիսյանին դիմեց «Հայաստան» խմբակցության պատգամավոր Քրիստինե Վարդանյանը։
Նա անդրադարձավ ՔՊ-ական պատգամավորների հայտարարություններին, թե Հայաստանը ՌԴ-ի գուբերնիա է։
«Ոնց որ մի քանի տարի պահանջվեց, որ իշխելուց հետո հասկանայիք, որ մենք գուբերնիա ենք, այդ մի քանի տարին գուբերնատորնե՞ր էիք»,- հայտարարեց պատգամավորը։
Վարդանյանը նշեց, որ 2025 թվականի պետական բյուջեով Նախագահի աշխատակազմին հատկացվել է 1 մլրդ 658 մլն դրամ, իսկ վարչապետի աշխատակազմին 24 մլրդ 365 մլն դրամ։
«Սա նշանակում է, որ դուք՝ սիրելի քաղաքացինե՛ր, շնորհավորում եմ, ունեք ամենաթանկ վարձատրվող մշակույթի գործիչը՝ դաշնակահար, որը մեկ-մեկ շնորհավորական բացիկներ է գրում և նրա համար ամեն օր ՀՀ քաղաքացիները վճարում են 11 հազար դոլար, որ այդ մարդը գնա նկարվի հուղարկավորություններին, և շնորհավորական բացիկներ գրի, իսկ ահա վարչապետի աշխատակազմի համար դուք ամեն օր վճարում եք 166 հազար դոլար»,- նկատեց ընդդիմադիր պատգամավորը՝ հիշեցնելով, որ 2018 թվականին Նախագահի աշխատակազմի և կառավարության համատեղ բյուջեն մոտ 8 մլդ դրամ էր։
Պատգամավորը նշեց, որ սեփական ֆինանսավորումը 4 անգամ ավելացրել է այն ուժը, որն առնվազը երկու նախարարություն է փակել՝ աշխարհում ամենամեծ սփյուռք ունեցող ազգի սփյուռքի նախարարությունը և ռազմավարական նշանակություն ունեցող գյուղատնտեսության նախարարությունը՝ օպտիմալացման նպատակով։
«Ընենց են օտիմալացրել մարդիկ, որ ծախսերը 8 անգամ աճել է»,- ասաց Քրիստինե Վարդանյանը։
