Կոնջորյանն ընդդիմությանը խորհուրդ է տալիս բարձրացնել արդյունավետությունն ու ինքնահայեցումը, ոչ թե ճամարտակել

ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը համամիտ չէ ընդդիմության այն տեսակետին, թե համակարգային փոփոխությունները կապված են նախատեսվող հերթական կամ արտահերթ խորհրդարանական ընտրությունների հետ:

Ավելին, նա այն համոզմունքին է, որ ընդդիմության նման հայտարարությունների պատճառը նրանց վախերն են։

«Ընդդիմության վախերն ակնհայտորեն բյուրեղացնում են հենց իրենց բարդույթները, որովհետև շատ լավ հասկանում են, որ հանրության շրջանում իրենց հավանության մակարդակը շրիշակից էլ ներքև է իջել, և այդտեղ նրանք լրջագույն ռիսկեր են տեսնում»,- խորհրադարանական ճեպազրույցի ժամանակ ասաց Հայկ Կոնջորյանը։

Նա տեղեկացրեց, որ ՔՊ-ն արտահերթ խորհրդարանական ընտրությունների ծրագրեր չունի։

«Հայաստանում 2021 թվականին են տեղի ունեցել արտահերթ խորհրդարանական ընտրությունները, Հայաստանի ժողովուրդն իր կամքը ձևակերպել է ընտրությունների արդյունքում: Հաջորդ հերթական ընտրությունները 2026 թվականին են, և մենք մինչև 2026 թվականը մի շարք անելիքներ ունենք ժողովրդի կողմից մեզ տրված մանդատն իրագործելու ճանապարհին»,- ասաց նա:

Կոնջորյանն ընդդիմությանը խորհուրդ տվեց օգտվել առիթից և ինքնահայեցման սեփական օրինակը ցույց տալ։

«Կարծում եմ՝ ինքնահայեցումը, ռեֆլեքսիան մի բան է, ինչն ընդդիմության մոտ բացարձակապես գոյություն չունի»,- ասաց ՔՊ-ական պատգամավորը՝ հավելելով. «Կարծում եմ՝ հրապարակային պրոցեսները պիտի նաև իրենց հուշեն, որ մի քիչ էլ աշխատեն սեփական արդյունավետությունը բարձրացնելու համար, ոչ թե ճամարտակեն իշխանության գործողություններն աղավաղված, աղճատված կերպով ներկայացնելու համար»։