Մի փորձեք քաղաքացիների վրա ձեր սահմանած սակագինը «լավություն» ծախել. ավագանու ընդդիմադիր անդամը` իշխանականին

Սահմանեք մի հատ ավելի ճոխ մի 2000 դրամանոց սակագին, երևանցիներին էլ ասեք` զեղչ ենք անում։ Այս մասին, այսօր՝ նոյեմբերի 19-ին, Երևանի ավագանու նիստում տրանսպորտի ուղեվարձի թանկացման ֆոնին որոշակի խավերի համար արտոնություններ սահմանելու հարցի քննարկման ժամանակ նշեց «Մայր Հայաստան» խմբակցության անդամ Մեսրոպ Մանուկյանը։

«Մի փորձեք քաղաքացիների վրա ձեր սահմանած սակագինը լավություն ծախել»,- ասաց Մեսրոպ Մանուկյանը՝ նախագիծը ներկայացնող փոխքաղաքապետ Սուրեն Գրիգորյանին․ «Իրերն անվանում են իրենց անվանումով, իսկ մանիպուլյացիայի ուստեքին, որ եկա այդտեղ հայտարարությունների ժամանակ, հատիկ առ հատիկ ի ցույց կդնեմ»,- ասաց Մեսրոպ Մանուկյանը։

Հարցը զեկուցող փոխքաղաքապետ Սուրեն Գրիգորյանն էլ արձագանքեց. «Պարոն Մանուկյան, ես իրոք հասկանում եմ, որ դուք ամբողջ օրը ձեր ուղիղ եթերում օրը մի վեց անգամ իմ անունը տալով երևի ակնկալում եք, որ ես պետք է ուրախանամ, նեղվեմ և այլն, բայց չգիտեմ, ի դժբախտություն, թե ի ուրախություն ձեզ, ասեմ, որ առանձնապես ձեր ելույթներն իմ էմոցիոնալ ֆոնի վրա ո'չ բացասական, ո'չ դրական չեն ազդում: Հուսով եմ` դա ձեզ չի նեղացնի։

Պայմանագրի ինձ տալու մասով էլ անհրաժեշտություն չկա, որովհետև այդ պայմանագիրն իմ ամենօրյա աշխատանքային փաստաթուղթն է, ու այնպես, ոնց որ այդ պայմանագրի մանրամասները գիտեմ ես ու հասկանում եմ, չեմ կարծում, որ դուք օբյեկտիվորեն այդքան տիրապետում եք, որ մի հատ էլ ինձ ասեք, թե այդ պայմանագիրն ինչ է ենթադրում։

Ուզում եք կետերը բարձրաձայնեք՝ բարձրաձայնեք, ուզում եք ձեր մանիպուլատիվ մեկնաբանությունները անեք՝ արեք, ոնց որ ձեր իրավունքն է ինչ-որ առումով, բայց ձեր կողմից այդ պայմանագիրը ինձ տալու ես ամենևին կարիք չունեմ»: