Զավակները փորձում են Արցախում մաhացած 70-ամյա Վերայի դիակը տեղափոխել Հայաստան
Մոտ մեկ ամիս առաջ ադրբեջանական APA գործակալությունը, հղում կատարելով թշնամական երկրի առողջապահության նախարարությանը տեղեկացրեց Ստեփանակերտում մահացած 70-ամյա Վերա Աղասյանի մահվան մասին: Պատճառը նշվեց առողջական խնդիրները։
Ավելի ուշ պարզվել էր, որ Վերայի ընտանիքի անդամներն ապրում են Հայաստանում։
MediaHub-ը փորձեց կապ հաստատել նրանց հետ։ Մեզ ասացին, որ զավակները փորձում են ԿԽՄԿ առաքելության միջոցով Վերայի դիակը տեղափոխել Հայաստան՝ վերահուղարկավորելու նպատակով։
«Ստեփանակերտում մնացած 14 հայերից 3-ը մեր հարազատներն են, մեկը՝ Վերան էր։ Ամեն անգամ զանգ ստանալով խոսում էինք բոլորի հետ, կիսվում մեր որպիսությամբ։ Վերայի մահվան լուրը տարածվելուց հետո՝ շուրջ մեկ ամիս նրանցից ոչ ոք առայժմ կապի դուրս չի եկել։ Բոլորը միասին ապրում են նույն հյուրանոցում»,- մեզ հետ զրույցում ասաց ընտանիքի բարեկամը։
Վերա Աղասյանը 4 զավակ ունի։ Արցախի հայաթափման օրերին, հակառակ ընտանիքի անդամների հորդորներին՝ մայրն ինքն է որոշել մնալ Արցախում, հատկապես, որ այնտեղ մնացողներից 2 տղամարդ իրենց բարեկամներն են։
«Ճիշտ է, հայկական լրատվամիջոցները գրում են, թե «Վերային դեռ չեն հուղարկավորել» կամ «դիակը հայկական կողմին չեն փոխանցում», բայց որքանով ես եմ տեղյակ՝ Կարմիր խաչի Բաքվի և Երևանի գրասենյակներն այդ հարցով բանակցում են»,- ասաց նա։
Հիշեցնենք, որ Վերայի մահվան մասին լուրերն ադրբեջանական լրատվամիջոցները տարածեցին հոկտեմբերի 23-ին։ Նշվում է, որ նրա դին տեղափոխել են Բարդա քաղաքի դիահերձարան։
Դատաբժշկական ախտորոշմամբ՝ մահվան պատճառը եղել է սրտի քրոնիկ իշեմիկ հիվանդությունը, աթերոսկլերոզային կարդիոսկլերոզը, թոքային այտուցը, ներքին արյունահոսությունը և թոքային զարկերակի թրոմբոզը։
