Ճպճպացնելով ասում ա՝ ի՞նչ ա որ, մարդ ա՝ ավազ ա թափել, բա էլ ո՞ւր տանի․․․ տո ուր ուզում ա՝ տանի․ Փաշինյան

Կառավարության նիստի ժամանակ Նիկոլ Փաշինյանն իր համար ցավոտ մի դեպք հիշեց։ 

Վարչապետ դառնալուց հետո, նա եղել է Սևանում, այնտեղ իմացել է, որ Ցամաքաբերդի հետևով ճանապարհ կա, որը 40 տարի չի նորոգվել։

Փաշինյանը վստահեցրեց, որ այն ժամանակ արձագանքել են և այդ ճանապարհը հիմնանորոգել են: Բայց պարզվում է՝ լավ չեն աշխատել։

«Մի քանի ամիս առաջ էր, էլի հեծանվով անցնում էի և տեսա, որ դարպասների մոտ փոս է: Զանգել եմ մեր գործընկերներին, հարցնում եմ՝ տեղյա՞կ եք, ինձ ասում են, որ ոչ մի թույլտվություն չկա: Այսինքն, ժողովո՛ւրդ ջան, եթե պիտի հարց բարձրացնեք, մենք արձագանքենք, հետո դուք կտոր-կտոր քանդեք․․․ քանդած էր, թող հանգիստ քանդած մնար: Բայց մենք իր խնդրանքով իր տան դեմն ասֆալտ ենք արել, ու ըտենց բռնել քանդել ա»,- ասաց Փաշինյանը: 

Նա վստահեցրեց, որ նման դեպքերը տասնյակ հարյուրներով են:

«Ոչ մի հարևան չի ասել՝ լա՛վ, ինչի՞ եք քանդում: Սա լուրջ պրոբլեմ է, պետք է հասկանանք, թե ոնց ենք արձագանքելու: Տարիներով քանդված ճանապարհը սարքում ենք, հետո գնում տեսնում 7 կռազ ավազ են թափել այդ ճանապարհի վրա, ու երբ պաշտոնյային հարցնում ես, թե էս ի՞նչ ա, ճպճպացնելով ասում ա՝ ի՞նչ ա որ, մարդ ա՝ ավազ ա թափել, բա էլ ո՞ւր տանի: Կներեք արտահայտությանս համար,  տո ուր ուզում ա՝ տանի: Այս ապապետականությունն ամեն անկյունում է»,- ասաց Փաշինյանը։