Այսպիսի սովորություն ունեմ՝ վերադառնում եմ, որպեսզի տեսնեմ մեր կատարած գործի արդյունքը․ Փաշինյան

Նիկոլ Փաշինյանը սեփական աչքերով մի քանի օրինակ է տեսել։ Ասում է՝ ընդհանրապես այդպիսի սովորություն ունի՝ «վերադառնում եմ, որպեսզի տեսնեմ մեր կատարած գործի արդյունքը»։

«Վերադառնում եմ, որպեսզի տեսնեմ, թե այդտեղ ինչ է կատարվում»,- կառավարության նիստի ժամանակ ասաց նա։

Փաշինյանն առնվազն մի քանի դեպք է տեսել և դրանց մասին պատմել գործընկերներին։

«Նորոգված ճանապարհները հանձնելուց մի 6 ամիս հետո, եթե գնանք, այնտեղ կարող ենք տեսնել քանդված վիճակ: Կոնկրետ դեպքերով հետաքրքրվել եմ, թե այդտեղ տրվե՞լ է քանդելու թույլտվություն կամ որևէ միջամտություն անելու, և պարզել եմ, որ այդ դեպքերում որևէ թույլտվություն չկա: Այդ ընկալումը կա՝ դե հիմա իմ դռան դեմն է, հիմա ինչ անենք, որ պետությունը 500 մլն կամ 1 մլդ դրամ փող է ծախսել»,- հայտարարեց Փաշինյանը:

Նա ավելացրեց, որ դա շատ լուրջ խնդիր է, և ինքը կոնկրետ տեղերով գիտի, թե դրանք որ հատվածներում են։

«Այստեղ պետք է հասկանանք, թե այս պրոբլեմի հետ ո՞նց ենք առնչվում: Այստեղ առաջին հերթին համայնքներն անելիք ունեն: Այդ խնդիրը նաև բարձրացնում եմ պարեկային ոստիկանության մոտ: Մենք ինչո՞ւ ենք ներդրել պարեկային ոստիկանության ինստիտուտը, որովհետև պարեկային ոստիկանությունն առաջին հերթին պետության աչքն է, և մեր հարգելի պարեկները պետք է հասկանան, որ չպետք է իրադրությունների կողքով անտարբեր անցնել: Կարելի է տեսնել, որ մարդիկ մայրուղին քանդում են: Պետք է կանգնել ու հարցնել՝ արդյոք ունե՞ն դրա թույլտվություն»,- ասաց նա: