Վարչապետն էլ իր աշխատավարձը ուղարկեց

Գյումրեցի լուսանկարիչ Հայկ Բարսեղյանի նախաձեռնած դրամահավաքին է միացել նաև ՀՀ վարչապետ Հովիկ Աբրահամյանը: Գյումրիի 13 անօթեւանների բնակարաններ գնելու ծրագրի շրջանակում նա փոխանցել է իր մեկ ամսվա աշխատավարձը:

Այս «առատաձեռնությունը» ցուցաբերելիս` Հովիկ Աբրահամյանը հայտարարել է, թե իր ներդրումը կատարում է որպես Հայաստանի հանրապետության քաղաքացի և ոչ թե որպես վարչապետ:

Հարկ է նկատել, սակայն, որ Հովիկ Աբրահամյանը փոխանցել է իր` որպես վարչապետի, և ոչ շարքային քաղաքացու աշխատավարձը:

Այս հայտարարության տրամաբանությունը թերևս պատճառաբանվում է միայն նրանով, որ վարչապետը հնարավարություններն ավելի շատ են, քան կատարած ներդրումը: Ու Հովիկ Աբրահամյանն ինքն էլ գիտակցում է այդ մասին:

Իր ունեցվածքի համամեմատ նա կարող էր հետևել խնամու` ԲՀԿ նախկին նախագահ Գագիկ Ծառուկյանի օրինակին ու նվիրեր ասենք 3 կամ առնվազն մեկ բնակարան:

Իսկ որպեսզի պատկերացնենք վարչապետի հնարավորությունները` նկատենք, որ Բարձրաստիճան պաշտոնյաների էթիկայի հանձնաժողով ներկայացրած հայտարարագրերի համաձայն` Հովիկ Աբրահամյանի 2015թ-ի միայն դրամական ունեցվածքը, հասնում է մոտ 7 միլիոն ԱՄՆ դոլար:

2012 թվականի մարտի 3-ին էլ Հովիկ Աբրահամյանը հայտարարագրել է 3 բնակարան Երեւանում և 1 ավտոկանգառ: Իսկ ԱԺ շենքի նմանությամբ կառուցված տունը, ըստ որոշ հաշվարկների, մոտ տասը միլիոն դոլար արժողություն ունի:

Ստացվում է այնպես, որ «աչքը կուշտ» թվացող վարչապետն, այնուամնայնիվ, «ժլատ» է գտնվել իր երկրի անտուն քաղաքացու նկատմամբ ու չի ցանկացել գոնե մեկ ընտանիքի ապահովել տանիքով: