Իմ ժամանակ քաղաքապետարանին ասում էին` «հերանց տուն», հիմա` «պալիցեյսկի կառույց»․ Վարդան Ղուկասյան

«Հրապարակի» զրուցակիցը Գյումրու նախկին քաղաքապետ Վարդան Ղուկասյանն է:

- Պարոն Ղուկասյան, տեղեկություններ կան, որ Գյումրու քաղաքապետի ընտրություններին Դուք էլ եք մասնակցելու:

- Էդ ինչի՞ց ես զարմանում որ:

- Չեմ զարմանում: Ի դեպ, Վարդան Ղուկասյանը` Դոգն էլ է հայտարարել մասնակցելու մասին, թեեւ անձամբ առաջադրվելու իրավունք չունի: Գուցե մտածել եք, որ երկու Վարդան Ղուկասյաններին կշփոթե՞ն ընտրողները:

- Է, ի՞նչ գիտեք, որ նրանից շփոթելու են` ինձ ձայն տան, գուցե իմ ձայները շփոթեն, իրեն տան: Հա, բայց …. ես էնքան բան եմ արել էս քաղաքի համար, որ… Մտածում եք՝ թեկնածություն եմ դնում, որ Դոգի՞ց ձայներ տանեմ, հա՞:

- Ի՞նչ խնդիրներ կան այս պահին Գյումրիում, իշխանությունն ասում է, որ միայն ՔՊ-ն ու ՔՊ-ական քաղաքապետը կարող են ծաղկեցնել քաղաքը, բայց գյումրեցիները մեզ հետ զրույցում ասում են, որ բազմաթիվ խնդիրներ կան:

- Մի օր որ եկաք Գյումրի, ես Ձեզ էնքան բաներ կասեմ, հիմա չեմ ուզում ծրագրերին անդրադառնամ, որովհետեւ, եթե ծրագրերին անդրադառնամ, ապա լուրջ մարդկանց ծրագրերը գողանում են:

- Բայց, օրինակ, եթե Դուք կրկին դառնաք քաղաքապետ, ի՞նչ փոփոխություններ կանեք:

- Ամենաառաջնային խնդիրը գիտե՞ք որն է: Իմ օրոք որ աշխատում էին, մարդիկ քաղաքապետարանին ասում էին` «հերանց տուն»: Հիմա ինձնից անցել է 12 տարի: Հիմա ասում են՝ «պալիցեյսկի» կառույց է, ո՞վ է ստեղծել: Գերմանացիների ժամանակ «պոլիցայներ» կային է, դրանց նման: Թուրքը խոզի մսից ինչ ձեւի է տրաքվում, էդպես Գյումրու քաղաքապետարանը` շենք-շինություն կառուցելուց: Բոլորին լցրել են դատարաններն ու դատախազությունները: Քաղաքապետարանը եթե չի նպաստում շենք-շինություն կառուցելուն, ուրեմն էդ քաղաքապետերին մորթել է պետք: Համար առաջին խնդիրը դա է: Վերականգնել այն անդունդը, որը ստեղծվել է ժողովրդի ու քաղաքապետարանի միջեւ: Էն ժամանակ ես եկա` վերացրի էդ ամենը, մարդիկ էդ սկզբունքով էին առաջնորդվում: Հիմա որ նորից եկա, դա եմ վերականգնելու:

- Ի՞նչն եք վերականգնելու:

- Այսինքն` խիղճն եմ վերականգնելու՝ առաջին հերթին: Էն, որ ասում են՝ օգնեցեք, բալա ջան, տեր եղեք, այ, դրա համար եմ ուզում գալ:

- Ի՞նչ կարծիք ունեք հնարավոր թեկնածուների մասին:

- Նրանցից ոչ մեկին չեմ ճանաչում, գյումրեցիներն էլ չեն ճանաչում, հլը մեկի անունն ասեք՝ տեսնեմ, սաղ անծանոթ են:

- Իշխանությունները մինչեւ հիմա Կարեն Սարուխանյանի մասին էին ասում, հիմա արդեն վստահ չեն:

- Նա ո՞վ է, կյանքում որտե՞ղ է աշխատել, ի՞նչ է արել: Քաղաքի համար ի՞նչ է կառուցել, լավ` իրա տան համար: Իրա տունը գոնե ի՞նչն է սարքել` տան զուգարա՞նը, «ունիվալնի՞կը», գոնե էդ մարդիկ, ում անունները տալիս են, սարքած կա՞ն: Թե ոնց կարելի է դրանց վստահել:

- Իսկ գյումրեցիներն ի՞նչ տրամադրություններ ունեն: Դուք ունե՞ք շանսեր:

- Ամենաանապահով խավը Գյումրիում է ապրում: Ի՞նչ տրամադրություններ պետք է ունենան, եթե էս ժողովրդի վիճակը սա է: Գյումրին Հայաստանի երկրորդ քաղաքն է, բայց ապրում է դպրոցական տուրիզմով: Այսինքն` երկու ամսով է այդ տուրիզմը, հարուստները Երեւան են գնում: Գյումրու տուրիզմից են գիշեր-ցերեկ խոսում, բայց երկու ամսով է էդ տուրիզմը: Հիմա եկեք նայեք` խանութներ, սրճարաններ, լրիվ դատարկ են, չեն էլ աշխատում: Մարդ կա՝ Գյումրիում 10-15 բիզնես ունի, ոչ մեկը չի աշխատում էսօր: Դռները փակ են, չեն աշխատում: Սա արդեն գոյատեւել էլ չէ:

- Բալասանյան դաշինքին ինչո՞ւ Փաշինյանը գահընկեց արեց, ի՞նչ եք կարծում:

- Ի՞նչ ասեմ, թող դրանք էլ դնեն, տեսնեն իրենց ձայները, տեսնեն՝ ովքեր են իրենք: Ես չգիտեմ՝ ինչու հեռացրեց իշխանությունը: