Ի՞նչ նպատակի համար է ծախսվելու 120 մլն դրամը. «Փաստ»

«Փաստ» օրաթերթը գրում է.

«Արդեն մի քանի տարի է, ինչ «Հայաստան» համահայկական հիմնադրամի կազմակերպած ամենամյա մարաթոնը կրում է «Քեզ համար Հայաստան» խորագիրը: Այս տարի այն անցկացվեց նոյեմբերի 28-ին: 

Ամենամյա 27-րդ հեռուստամարաթոնի ընթացքում ամենամեծ նվիրաբերումներից մեկն արել է «Արդշինբանկը»՝ 120 մլն ՀՀ դրամ՝ «ի ծառայումն մեր երկրի ամրապնդմանն ու զարգացմանը»: «Համահայկական դրամահավաքը, որն անցկացվում է «Քեզ համար Հայաստան» կարգախոսի ներքո, համախմբում և միավորում է աշխարհասփյուռ հայությանը՝ բոլորիս միասնական ջանքերն ուղղելով համազգային նշանակության մի շարք ծրագրերի իրականացմանը, և «Արդշինբանկը» չէր կարող անմասն մնալ: Իր մասնակցությամբ բանկը նաև ուղղորդում է իր գործընկերներին՝ միավորվելու և սատարելու հիմնադրամին՝ համահայկական խնդիրների լուծման ճանապարհին»,-ասված է բանկի հաղորդագրության մեջ: 

Ի դեպ, ուշագրավ է, որ «Արդշինբանկը» պատրաստվում է դիմել «Հայաստան» համահայկական հիմնադրամին՝ խնդրելով իր կողմից տրամադրվող 120 մլն ՀՀ դրամ աջակցության ողջ գումարը հատկացնել 44օրյա պատերազմում հենաշարժողական խնդիրներ ստացած, խեղում կամ հիվանդություն ձեռք բերած անձանց և նրանց ընտանիքների համար Կոտայքի մարզի Բալահովիտ համայնքում բնակելի ավանի կառուցման ծրագրին, որն իրականացվում է «Զինվորի տուն» բարեգործական ՀԿ-ի հետ համատեղ»:

Մանրամասները` թերթի այսօրվա համարում