Հայաստանին համատարած լոլիկացում չի սպառնում

Երբ 2015թ-ին Ռուսաստանն արգելեց Թուրքիայից բանջարեղենի արտահանումը դեպի ՌԴ, այն ծանր հարված հասցրեց թուրքական տնտեսությանը, քանի որ ՌԴ-ն մեծ շուկա էր Թուրքիայի համար: Պատժամիջոցներից հետո, թուրքական լոլիկ ներկրվում է Հայաստան, թե ոչ, այս հարցին պատասխանում են` քիչ քանակով:

Նշենք, որ միշտ էլ, նույնիսկ այն ժամանակ, երբ արգելված էր Թուրքիայից սննդամթերք ներկրել Հայաստան, թուրքական լոլիկը, և ոչ միայն լոլիկը ներկրվում էր, սակայն կամ Հայաստան էր մտնում այլ ապրանքի անվան տակ, կամ չէր արձանագրվում որպես թուրքական: Այսինքն ներկրողները  հայկական մաքսատունը շրջանցելու հմուտ միջոցներ ունեին, իսկ ՌԴ պատժամիջոցներից հետո հայկական հնարամտությունը քառապատկվել է: Հիմա էլ ներկրում են լոլիկ, քանի որ արդեն մի քանի տարի է, որ թույլատրվում է  սննդամթերքի ներկրում Հայաստան Թուրքիայից, որից հետո ներկրվող լոլիկը վերարատահանվում է: Ցանկացած այլ երկրում գրեթե անհնարին էր նման խարդախություն անել, սակայն հայկական հնարամտությունը անսահաման է:

Հիշենք թեկուզ մի քանի տարի առաջ ձկան արտահանման ժամանակ առաջացած պատմությունը, երբ Ռոսսելխոզնադզորը արգելեց 4 ձուկ արտահանող ընկերություններին ՌԴ արտահանել ձկնամթերք: Այն ժամանակ, ինչպես հայտնի էր հայ բարձրաստիճան պաշտոնյաներից մեկի  մատն էր խառը այս պատմությանը, պարզապես փորձում էին որոշ ձկնամթերք արտահանողներից գումարներ կորզել: Ինչպես ասում են, ոչ մի խնդիր ձկնամթերքի հետ, միայն բիզնես: Գրեթե նույն պատմությունը կրկնվեց վերջերս, երբ լոլիկ էր արտահանվել Հայաստանից, որը վարակված էր հարավ-ամերիկյան ցեցով: Թեև Ռոսսելխոզնադզորը ավելի ուշ հերքեց, թե Հայաստանից է ներկրումը, այլ մեկ այլ երկրից, սակայն այդպես էլ չհստակեցվեց, թե որ երկրից էր վարակված լոլիկը հայտնվել ՌԴ տարածքում:

Այս դեպքում ևս չի բացառվում, որ ՀՀ որոշ պաշտոնյաներ հոգացել են, վարակված լոլիկի պիտակավորումը փոփոխվի իբրև անհայտ երկրի լոլիկ: Մաքսային ծառայություններից երբևէ օգտված քաղաքացին կարող է հավաստել, որ մաքսային փաստաթղթեր շփոթելը ՌԴ-ում գրեթե անհնար է: ՌԴ-ի բարձրաձայնմանը, որ Հայաստանից լոլիկի արտահանումը կտրուկ ավելացել է, Հայաստանը  պատասխանեց, որ ջերմոցային տնտեսությունների տարածքներն են ավելացել: Նշենք, որ երբ սկսվում է որևէ գյուղմթերքի արտահանում Հայաստանից, ապա տեղի շուկայում տվյալ մթերքի գները բարձրանում են: Այսօր Ազգային վիճակագրական ծառայությունը հրապարկել է վերջին ցուցանիշները, ըստ որի, բանջարեղենի ապրանքախմբում 2016թ.-ի փետրվարին 2015թ.-ի փետրվարի համեմատ արձանագրվել է 2.1%, իսկ 2016թ. հունվարի համեմատ` 13.4% գնանկում: Վերջինս հիմնականում պայմանավորվել է կանաչ սոխի` 33.7%, խառը կանաչեղենի` 22.3%, լոլիկի` 21.2%, գնանկմամբ: Լոլիկի գները բարձրանալու փոխարեն` 21.2 տոկոսով անկում են ապրել:

Այսինքն ոչ թե հայերն են դադարել լոլիկ ուտել, այն պարզապես մեծ քանակությամբ ներկրվում է, արդեն հայտնի երկրից, վերջին շրջանում իրացման կետերում անգամ 200 դրամով մեկ կգ լոլիկ է վաճառվել, աննախադեպ իրադարձություն այս շրջանում լոլիկի վաճառքում: Այնպես, որ համատարած լոլիկացում չի սպառնում Հայաստանին, Ռուսաստանը զգուշանում է վերաարտահանվող թուրքական լոլիկից, դրա համար ունենալով բոլոր հիմքերը: