ՀՀ ԱԳՆ-ում ֆորում են անելու ընդդեմ ցեղասպանությունների․ հայեցակարգում չկա Հայոց ցեղասպանություն եզրույթը. Հայկ Դեմոյան

Կարդում եմ Հայաստանի Հանրապետության արտգործնախարարության նախաձեռնությամբ ս. թ. դեկտեմբերի 12-13-ը Երևանում կազմակերպվող Ընդդեմ ցեղասպանության հանցագործության հինգերորդ գլոբալ ֆորումի հայեցակարգային դրույթները: Հինգ էջից բաղկացած այդ տեսական շարադրվածքի մեջ ընթերցողը կարող է նկատել «Ռուանդայի ցեղասպանություն» արտահայտությունը, բայց այնտեղ չկա «Հայոց ցեղասպանություն», «արցախահայերի էթնիկ զտում» կամ «Արցախի հայաթափում» արտահայտությունները: Այս մասին ֆեյսբուքյան իր էջում գրել է Հայկ Դեմոյանը։

«2022 թ. կայացած գլոբալ ֆորումին մասնակցելու հրավեր ինձ չուղարկվեց: Առանձին գրառումով նշեցի, որ թերևս դա պայմանավորված էր նրանով, որ հինգ հայ նիստավարներից չորսը տարբեր քրեական գործերի շրջանակներում իմ կողմից մեղադրվում են Հայոց ցեղասպանության թանգարան-ինստիտուտում գողություններ կատարելու, հաստատությանը նյութական վնաս հասցնելու, փողերի լվացման ու ֆինանսական փաստաթղթերի ոչնչացման համար: Նիստավարներից մեկը դատական հայց ներկայացրեց իմ դեմ և վերջին նիստի ժամանակ ոչ ինքը, ոչ էլ իր փաստաբանը չներկայացան՝ քանի որ դատարանի դահլիճում հրապարակվելու էր թանգարանի անվտանգության աշխատակիցների՝ ինձ տրամադրված երկու տեսագրություն, որոնք մինչ օրս չեմ հանրայնացրել:

Բայց ես բարի եմ ու մեծահոգի ու երբեք չեմ նեղանում, երբ ինձ մոռանում են: Ուստի հեռակա կարգով իմ զեկուցման թեման կունենա հետևյալ վերնագիրը. «Հայաստանի Հանրապետության գործող իշխանությունների մեղսակցությունը էթնիկ զտումների իրականացման, Հայոց ցեղասպանության պատմական փաստի ժխտման և Հայոց ցեղասպանության թանգարան-ինստիտուտում իրականացված քրեորեն պատժելի գործողություններում»:

Կարծում եմ, որ դեռ բավական ժամանակ կա ինձ հրավիրելու համար»: