Տիգրան Ավինյանը շուրջ 1,5 տարի գաղտնի կերպով թիմ է հավաքել, որ գա իշխանության, Փաշինյանն իմացել է. ի՞նչ է սպասվում

Այսօր առավոտյան երևանցիները, կանգառներ դուրս գալով, «հայտնաբերեցին», որ քաղաքապետարանի ենթակայությամբ գործող ավտոբուսները չեն աշխատում: Պարզվեց` գործադուլ են հայտարարել:

«Ասեք` կանենք» ասող քաղաքապետին վարորդները մի քանի պահանջ են «ասել», որոնք խոստացել, բայց չի արել «անող» քաղաքապետը:

Տիգրան Ավինյանի դեմ այս գործադուլը, սակայն, պարզվում է` միայն ծաղիկներն են: Նրան դեռ նորանոր գլխացավանքներ են սպասվում, ընդ որում` արդեն «վերևներից»:

Գանք սկզբից. NEWSPRESS.am-ի բացառիկ տեղեկություններով` ներկայումս և դեռևս Երևանի քաղաքապետ աշխատող Տիգրան Ավինյանը դեռ 1,5 տարի առաջ սկսել է սեփական թիմ հավաքվել, ինչը նրան հաջողվել է: Դրանում ընդգրկված են բավականին խելացի ու պրոֆեսիոնալ կադրեր: Դրանից բացի, խորամանկ երիտասարդն, այսպես ասենք, իրենով է արել քաղաքապետարանի ենթակայությամբ գործող հաստատությունների ղեկավարներին` նրանց ավելի շատ վճարելով: Էլ չենք ասում, որ նրա կինն իրեն հինգ պակաս առաջին տիկին զգալով` վերջերս բարեգործություն էր անում` արցախցի երեխաներին դպրոցական պայուսակներ ու «Արամ» արջուկներ բաժանելով:

Այսպիսով. Ավինյանը հավաքել է պրոֆեսիոնալ թիմ ու հույժ գաղտնի պահել այդ թիմով իշխանության գալու մտադրությունը: Այդ մասին փաստող տեղեկությունները դրվել են Նիկոլ Փաշինյանի սեղանին...

Նույնիսկ սեփական ստվերից վախեցող Փաշինյանն էլ հրահանգել է ամեն գնով չեզոքացնել Ավինյանին: Նախ պաշտոններից հեռացվեցին նրա որոշ մտերիմներ, հիմա էլ անսպասելի գործադուլը: 

Փաշինյանը, մեր տեղեկություններով, ավելի հեռուն է գնալու` հրահանգելու է ԱԱԾ-ին, իբր, ինչ-որ կոռուպցիոն գործերով ձերբակալել Ավինյանին: Իսկական պատճառն, իհարկե, ամենևին էլ կոռուպցիան չի լինելու, այլ հենց աչքն իր աթոռի վրա տնկելը:

Փաստենք` Նիկոլ Փաշինյանը ոչ միայն վատ կառավարիչ է, այլ նաև վատ բռնապետ. նույնիսկ սեփական թիմը ո´չ մուրճով, ո´չ զոռբայությամբ տիրապետել չի կարողանում: Թիմ, որ հավաքական կերպով նույն` «ՔՊ» անունով է կոչվում, բայց որի ներսում յուրաքանչյուրն իր հեռահար նպատակներն ունի:

Ի՞նչ խոսք, քաղաքականության մեջ դժվար է առանց հավատարիմների, բայց հավատարիմներ ունենալու համար նախ ինքդ չպետք է աջուձախ դավաճանես...