Հովիկ Աբրահամյանը Չերչիլից բացի թող Սերժ Սարգսյանի հայտարարությունը հիշի

Համաշխարհային բանկը անդրադարձել է Հայաստանի պետական պարտքի ավելացման տեմպերին, ըստ որի ՀՆԱ-ի նկատմամբ պետական պարտքի մակարդակը 48 տոկոս է կազմում, այն դեպքում, երբ մեր տնտեսությունը կքած այդ պարտքի տակ` հազիվ քարշ է գալիս: Իսկ ամենակարևոր խնդիրը մնում է օդում կախված` որևէ թափանցիկ հաշվետվություն չի ներկայացվում, թե այդ վարկերը որտեղ և ինչպես են ծախսվում:

Համաշխարհային բանկը Հայաստանի տնտեսական աճի մասով ևս բավականին տխուր ցուցիչ է նշում, ըստ որի Հայաստանը այս տարի կունենա ամենացածր տնտեսական աճը վերջին վեց տարվա կտրվածքով: Հայաստանը, ըստ Համաշխարհային բանկի, այս տարի 2,5 տոկոսից բարձր աճ չի գրանցի: Միջազգային ֆինանսական կառույցը խնդիր է տեսնում նաև Հայաստանի պետական եկամուտների ապահովման մասով, մտահոգություն հայտնելով, որ 2016 թվականի հունվարին եկամուտների փաստացի հավաքագրումը մեկ տարի առաջվա համեմատ ցածր է, և եթե հունվարի միտումները շարունակվեն, ապա անցած տարի գրանցված հարկաբյուջետային ճնշումները կարող են 2016 թվականին կրկին զգացվել:

Միջազգային այս կառույցը տվել է Հայաստանի տնտեսության իրական պատկերը: Իսկ Հայաստանում Չեչիլը շարունակում է մնալ թիվ մեկ ուղեցույցը: Ժամանակին Արտաշես Գեղամյանն էր նեղն ընկած տեղը Չերչիլին հիշում, տարեվերջին էլ Չերչիլին հիշեց Հովիկ Աբրահամյանը` 2016 բյուջեն ներկայացնելիս. «Մի առիթով Չերչիլն ասել է՝ յուրաքանչյուր խելացի մարդ միշտ կարող է կազմել հաղթական ծրագիր, բայց մեկ պայմանով՝ եթե ինքը չէ այդ ծրագրի իրականացնողն ու պատասխանատուն»:

Բայց լավ կլինի, որ Հովիկ Աբրահամյանը Չերչիլին մեջբերելուց առաջ մեջբերում անեի Սերժ Սարգսյանի 2013 թվ հայտարարությունը.
«Հայաստանի Հանրապետության այն կառավարությունը, որը տարվա արդյունքներով, դա վերաբերում է 2013-2017 թվականներին, չապահովի տնտեսական 7 տոկոս աճ, այդ կառավարությունը պետք է հրաժարական տա»: