Հայաստանում վերջին տարիներին 2.3 անգամ կրճատվել է անպտղությունը. (տեսանյութ)

Այժմ կառավարությունը մշակում է ՀՀ ժողովրդագրական իրավիճակի բարելավման 2016-2018թթ.-ի ազգային ծրագիր, որը պետք է նպաստի նոր ընտանիքների ձևավորմանը և ծնելիության աճին։ Այս մասին «Անդրադարձ» մամուլի ակումբում լրագրողների հետ հանդիպման ժամանակ տեղեկացրեց ՀՀ Առողջապահության նախարարության մայրական և վերարտադրողական առողջության պահպանման բաժնի պետ Գայանե Ավագյանը: Նա նաև մանրամասնեց, որ լինում են ինքնաբեր վիժումներ, պտղի արատներ, որոնց դեպքում ստիպված ընդհատվում է հղիությունը։ Վաղաժամ ծննդաբերություններ, երբ երեխաները ծնվում են շատ փոքրիկ և նրանց ապրելու հնարավորությունը քիչ է, քան հասուն նորածիններինը:

«Թեև Հայաստանում վերջին տարիներին 2.3 անգամ կրճատվել է անպտղությունը, բայց ընդհանուր առմամբ մենք ունենք 14.9% անպտղություն։ Անպտղության 70-72% դեպքերում պատճառը կանայք են։ Այդ պատճառով այս ծրագրի շրջանակում մենք սկսելու ենք դեռահաս աղջիկների առողջության վերահսկման գործընթաց»,- նշեց նա:

Ասուլիսի մյուս բանախոս՝ Աշխատանքի և սոցիալական հարցերի նախարարության ժողովրդագրության բաժնի պետ Վանիկ Բաբաջանյանը խոսեց ծրագրի այլ բաղադրիչների մասին ՝ մասանվորպես նաև բնակարանային ապահովման պետական ծրագրում բարեփոխումներն են, որոնք հնարավորություն կտան առանց կանխավճարի դառնալ շահառու և ձեռք բերել բնակարան: Ըստ ծրագրի՝ բնակարանի առավելագույն գին դիտարկվել է 15 մլն դրամը՝ նորակառույցների դեպքում, որի ժամանակ ամսական վճարումների չափը՝ տոկոսներով հանդերձ, կկազմի 73 հազար դրամ ամսավճար: Մյուս տարբերակով հիփոթեք է տրամադրվում առավելագույնը 12 տոկոսով, որի դեպքում 2 տոկոսը սուբսիդավորվելու է, և դրանից կարող են օգտվել միջինը, իսկ քաղաքացին ամսական պետք է տա մոտ 70 հազար դրամի ամսավճար:

Մանրամասները՝ տեսանյութում